Voter Adhikar yatra: بہار کے لوگ کھینی کے ساتھ چونا بھی رگڑ کر کھا جاتے ہیں،اس لئے یہاں ووٹ کی چوری نہیں ہونے دی جائے گی:تیجسوی یادو

بہارمیں ایس آئی آر  کے خلاف راہل گاندھی کی ووٹ ادھیکار یاترا کے آغاز کے موقع سے ساسارام منعقدہ ریلی سے خطاب کے دوران تیجسوی یادو نے بہار میں ‘ووٹ رائٹس یاترا’ کو لے کر بی جے پی اور الیکشن کمیشن پر سخت حملہ کیا۔ انہوں نے کہا کہ امبیڈکر نے ہمیں ووٹ کا حق دے کر اقتدار دیا، لیکن بی جے پی ہم سے یہ حق چھین رہی ہے۔ تیجسوی نے الزام لگایا کہ الیکشن کمیشن وزیر اعظم مودی کے کہنے پر کام کر رہا ہے اور ووٹر لسٹ میں گڑبڑ ہوئی ہے۔

 انہوں نے طنز کرتے ہوئے کہا کہ راہل گاندھی نے مردہ قرار دیے گئے لوگوں کے ساتھ چائے پی، جس سے الیکشن کمیشن کی غفلت بے نقاب ہوتی ہے۔ تیجسوی نے کہاکہ یہ چوری نہیں بلکہ ڈکیتی ہے۔ تیجسوی یادو نے واضح طور پر کہا کہ جمہوریت کو ختم نہیں ہونے دیا جائے گا اور لوگوں کے حقوق کو نہیں چھیننے دیا جائے گا۔ انہوں نے یقین دلایا کہ راہل گاندھی اور وہ عوام کے حقوق کے لیے مل کر لڑیں گے۔

مودی حکومت اور الیکشن کمیشن پر الزام لگاتے ہوئے انہوں نے کہا کہ وہ بہار کو دھوکہ دینے کی کوشش کر رہے ہیں۔ انہوں نے یہ بھی خبردار کیا کہ بہار میں  لوگ صرف کھینی نہیں کھاتے بلکہ کھینی کے ساتھ چوناکو  رگڑ کر چبالیا جاتا ہے۔ تیجسوی نے کہا کہ ان کی سیاست وعدوں پر نہیں بلکہ کام پر مبنی ہے ۔ہم نے جو کہا، ہم نے کیا اور جو ہم کہیں گے، ہم ضرور کریں گے۔

بھارت ایکسپریس۔