Vote of a BJP MLA’s brother’s family was deleted: اترپردیش میں بی جے پی ایم ایل اے کے خاندان کے نام ایس آئی آر کے بعد ووٹر لسٹ سے غائب

کشی نگر ضلع کے ہاٹا تحصیل کے رامپور سوہرونا گاؤں میں اسپیشل انسینٹیو رویزین SIR کے دوران ووٹر لسٹ میں بڑی بے ضابطگی سامنے آئی ہے۔ جہاں نئے نام شامل ہونے چاہئیں، وہاں ووٹرز کے نام کٹ گئے ہیں۔ بی جے پی کے رکن اسمبلی موہن ورما کے بھائی اور گاؤں کے پردھان راجندرورما سمیت ان کے خاندان کے 100 سے زائد افراد کے نام ووٹر لسٹ سے غائب ہو گئے ہیں، جس سے گاؤں میں ایک نئی بحث کا آغاز ہوگیا ہے۔

ووٹر لسٹ سے کٹے نام گاؤں میں ہلچل

نئی ووٹر لسٹ کے اشاعت کے بعد معلوم ہوا کہ گاؤں کے پردھان راجندرورما، ان کی اہلیہ اور بیٹے کے نام بھی غائب ہیں۔ گاؤں میں اب بحث یہ نہیں کہ اگلے انتخابات کب ہیں، بلکہ یہ ہو رہی ہے کہ SIR پروسیس میں ان کے خاندان کے نام کیسے اور کیوں حذف ہو گئے۔ ایس آئی آر کی ابتدائی لسٹ سامنے آنے کے بعد بی ایل او اور گاؤں کے سکریٹری نے فوری اجلاس بلایا، لیکن کئی گھنٹوں کی چھان بین کے باوجود اصل وجہ معلوم نہیں ہو سکی۔

گاؤں کے لوگ اور بی ایل او بھی الجھے

گاؤں کے باشندے بھی موقع پر پہنچے اور کئی گھنٹے کی کوشش کے باوجود معلوم نہیں ہو سکا کہ نام کیسے کٹے۔ گاؤں کے پردھان راجندرورما نے کہا: ’’صرف میرا ہی نہیں، میری بیوی اور بچے کے نام بھی غائب ہیں۔ اسی طرح 100 سے زائد لوگوں کے نام نئی ووٹر لسٹ سے غائب ہو گئے ہیں۔ میں مطالبہ کرتا ہوں کہ یہ نام دوبارہ شامل کیے جائیں۔‘‘

تحقیقات کی یقین دہانی

ہاٹا اسمبلی کے ایم ایل اے موہن ورما نے یقین دلایا کہ مناسب اقدامات کیے جارہے ہیں اور وہ معاملے کو سنجیدگی سے لے رہے ہیں۔ انہوں نے کہا ’’ڈی ایم اور بی ڈی او سے بات ہو گئی ہے، اور جہاں اصلاح کی ضرورت ہے کی جائے گی۔ اگر یہ نام جان بوجھ کر حذف کیے گئے ہیں تو ذمہ داروں کے خلاف کارروائی ہوگی۔‘‘

تکنیکی خرابی یا سیاسی سازش؟

اب سوال یہ ہے کہ یہ ایک ٹیکنیکل مسئلہ ہے یا ووٹر لسٹ میں سیاسی مداخلت کی گئی ہے۔ SIR پروسیس کی شفافیت پر یہ واقعہ سنجیدہ سوالات کھڑے کر رہا ہے۔

بھارت ایکسپریس اردو۔