Drug Kingpin Virendra Basoya: ’’دنیا کے کسی بھی کونے میں چھپ جاؤ، بچ نہیں پاؤ گے!‘‘ یو اے ای سے گرفتار کیے گئے ڈرگ مافیا بسویا کی واپسی پر امت شاہ کا سخت پیغام

بین الاقوامی ڈرگ سنڈیکیٹس کے خلاف بھارت سرکار کی سخت کارروائی کو ایک اور بڑی کامیابی ملی ہے۔ نارکوٹکس کنٹرول بیورو یعنی این سی بی نے یو اے ای سے مطلوب مفرور اور بین الاقوامی منشیات اسمگلر ویریندر سنگھ بسویا عرف ویرو کو گرفتار کرکے بھارت واپس لایا ہے۔ جمعہ کی صبح دہلی کے آئی جی آئی ایئرپورٹ پر اترتے ہی سکیورٹی ایجنسیوں نے اسے اپنی تحویل میں لے لیا۔

یو اے ای میں اس طرح ہوئی گرفتاری

دہلی کے سروجنی نگر کے رہنے والے ویریندر بسویا کے خلاف این سی بی کی درخواست پر انٹرپول نے ریڈ کارنر نوٹس جاری کیا تھا۔ اسی بنیاد پر رواں سال جون میں اسے یو اے ای میں گرفتار کیا گیا۔ اس کے بعد بھارتی ایجنسیوں نے وزارتِ خارجہ اور یو اے ای انتظامیہ کے ساتھ مسلسل رابطہ برقرار رکھا اور اس کی بھارت واپسی کی راہ ہموار کی۔

’کہیں بھی چھپ جائیں، قانون سے نہیں بچ سکتے‘: امت شاہ

اس بڑی کامیابی پر مرکزی وزیر داخلہ امت شاہ نے سوشل میڈیا پر خوشی کا اظہار کرتے ہوئے کہا کہ مودی حکومت بیرونِ ملک چھپے منشیات اسمگلروں کے نیٹ ورک کو پوری طرح ختم کر رہی ہے۔انہوں نے کہا کہ منشیات کے خلاف ’زیرو ٹالرنس‘ کی پالیسی کے تحت این سی بی نے ویریندر بسویا کی بھارت واپسی یقینی بنائی ہے۔ ہماری ایجنسیوں نے ثابت کر دیا ہے کہ مجرم دنیا کے کسی بھی کونے میں چھپ جائیں، وہ بھارتی قانون کی گرفت سے نہیں بچ سکتے۔

بیرونِ ملک سے چلاتا تھا منشیات کا نیٹ ورک

بسویا کا نام بھارت میں پکڑی گئی منشیات کی بڑی کھیپوں سے جڑا ہوا ہے۔ فروری 2024 میں پونے اور دہلی سے برآمد کی گئی مجموعی طور پر 1,837 کلوگرام میفیڈرون کے معاملے میں بسویا کا اہم کردار بتایا گیا ہے۔ وہ بیرونِ ملک سے اپنا نیٹ ورک چلاتا تھا اور منشیات کو دوسرے ممالک میں برآمد کرتا تھا۔اس کے علاوہ اکتوبر 2024 میں دہلی، اتر پردیش اور گجرات کے انکلیشور سے برآمد کی گئی 1,300 کلوگرام سے زائد کوکین اور ہائیڈروپونک ویڈ کے سنڈیکیٹ میں بھی بسویا ملزم ہے۔

’آپریشن گلوبل ہنٹ‘

این سی بی کی یہ کارروائی ’آپریشن گلوبل ہنٹ‘ کے تحت کی جا رہی ہے، جس کا مقصد بیرونِ ملک بیٹھ کر بھارت میں منشیات سپلائی کرنے والے بڑے سرغنوں کو گرفتار کرنا ہے۔

بھارت ایکسپریس اردو۔