“Dog Babu” gets Bihar residence certificate: ’’کُتّا بابو‘‘ اور ’’کتیا دیوی‘‘ کے بیٹے ’’ڈاگ بابو‘‘ کو ملا بہار کا رہائشی سرٹیفکیٹ، کیا اب ایس آئی آر فارم بھی بھرے گا؟

بہار کے ضلع پٹنہ کے ماساڑھی علاقے میں ایک ایسا واقعہ سامنے آیا ہے، جس نے پورے ہندوستان میں سرخیاں بٹور لی ہیں۔ حیران کن طور پر وہاں ایک کتے کو سرکاری طور پر رہائشی سرٹیفکیٹ مل گیا ہے، جس کی تصویر سوشل میڈیا پر وائرل ہو گئی ہے۔ کاغذات کے مطابق ’’رہائشی‘‘ کا نام ’’ڈاگ بابو‘‘ ہے اور اس کے والد کا نام ’’کُتّا بابو‘‘ اور والدہ کا نام ’’کتیا دیوی‘‘۔ جی ہاں، آپ نے بالکل درست پڑھا، یہ کوئی مذاق نہیں بلکہ ایک باضابطہ سرکاری دستاویز ہے۔

اس معاملے کے سامنے آنے کے بعد سرکاری نے بیان جاری کرتے ہوئے کہا ہے کہ جیسے ہی اس معاملے کا علم ہوا، سرٹیفکیٹ کو منسوخ کر دیا گیا اور درخواست گزار، کمپیوٹر آپریٹر اور سرٹیفکیٹ جاری کرنے والے افسر کے خلاف ایف آئی آر بھی درج کر لی گئی ہے۔ مزید برآں ایک سب ڈویژنل افسر کو اس معاملے کی تفتیش کے لیے 24 گھنٹے کا وقت دے دیا گیا ہے، تاکہ پتہ چلے یہ ’’ڈاگ بابو‘‘ کس طرح سرکاری کاغذات کا حصہ بن گیا۔

تاہم اس واقعے نے نہ صرف سوشل میڈیا پر میمز کی باڑھ لا دی، بلکہ ایک نہایت حساس سیاسی بحث بھی چھیڑ دی ہے۔ یہ واقعہ ایسے وقت میں سامنے آیا ہے، جب الیکشن کمیشن بہار میں ایس آئی آر کر رہی ہے۔ لیکن سوال یہ پیدا ہوتا ہے کہ اگر ’’ڈاگ بابو‘‘ جیسے کتے کو سرکاری کاغذات مل سکتے ہیں، تو عام انسانوں کے لیے یہ نظام کتنا محفوظ اور معتبر ہے؟ یوگندر یادو نے اس دستاویز کو شیئر کرتے ہوئے لکھا کہ ’’اپنی آنکھوں سے دیکھ لیجیے! بہار میں 24 جولائی کو ایک کتے نے رہائشی سرٹیفکیٹ بنوا لیا۔ یہ وہی سرٹیفکیٹ ہے جسے ایس آئی آر میں تسلیم کیا جا رہا ہے، جب کہ آدھار کارڈ اور راشن کارڈ کو فرضی بتایا جا رہا ہے۔‘‘

یہ واقعہ نہ صرف سرکاری انتظامات پر سوالیہ نشان ہے بلکہ عوامی اعتماد کو بھی چیلنج کرتا ہے۔ بہار حکومت کو چاہیے کہ جلد از جلد اس قسم کی غلطیوں کو روکنے کے لیے سخت اقدامات کرے، ورنہ اگلی بار شاید ’’بلی بیگم‘‘ یا ’’گیدڑ خان‘‘ بھی رہائشی سرٹیفکیٹ کے ساتھ سامنے آ سکتے ہیں۔‘‘

بھارت ایکسپریس اردو