DMK Manifesto 2026 Tamil Nadu Elections: تمل ناڈو انتخابات: خواتین کو 2000 روپے ماہانہ، کسانوں کے لیے مفت پمپ سیٹ، ڈی ایم کے نے جاری کیا انتخابی منشور

چنئی، 29 مارچ 2026: ڈی ایک کے نے آج تمل ناڈو اسمبلی انتخابات کے لیے اپنا انتخابی منشور جاری کیا۔ وزیراعلیٰ ایم کے اسٹالن نے خواتین، نوجوانوں، خاندانوں اور کسانوں کے لیے متعدد فلاحی اور ترقیاتی اقدامات کا اعلان کیا۔ منشور میں مالی امداد، تعلیم، روزگار، صحت اور بنیادی سہولیات کے فروغ پر زور دیا گیا ہے۔ چنئی میں پارٹی ہیڈکوارٹر میں خطاب کرتے ہوئے اسٹالن نے منشور کو ’سپر اسٹار‘ قرار دیا اور کہا کہ یہ گزشتہ منشوروں کے مقابلے میں زیادہ جامع اور مؤثر ہے۔ انہوں نے کہا کہ حکومت نے ریاست میں ترقی کے حوالے سے نمایاں کام کیا ہے اور اب ووٹروں کو ایک ایسا منشور پیش کیا جا رہا ہے جو ہر طبقے کے لیے فائدہ مند ہو۔

خواتین کے لیے فلاحی اقدامات
منشور میں خواتین کو ماہانہ 2,000 روپے کی مالی امداد دی جائے گی، جبکہ ہر سال نئے مستفیدین شامل کیے جائیں گے۔ ودیل پیانم کے تحت خواتین کے لیے مفت بس سفر جاری رہے گا۔ ناشتہ اسکیم کو آٹھویں جماعت تک بڑھایا جائے گا اور گھر کے لیے خریداری کرنے والی خواتین کو 8,000 روپے کا “ایلا تھراسی” کوپن دیا جائے گا۔ طبی سہولیات کا احاطہ 10 لاکھ روپے تک کیا جائے گا، جس میں 5 لاکھ روپے سالانہ آمدنی والے خاندان بھی شامل ہوں گے۔ بزرگ شہریوں، بیواؤں اور 50 سال سے زائد عمر کی غیر شادی شدہ خواتین کے لیے پینشن بڑھا کر 2,000 روپے ماہانہ کر دی جائے گی۔

نوجوانوں کے لیے اقدامات
نوجوانوں کے لیے ‘نان مدھلون’ اسکیم کے تحت 5 لاکھ افراد کو مہارت کی تربیت فراہم کی جائے گی اور ہر فرد کو 1,500 روپے ماہانہ وظیفہ دیا جائے گا۔ حکومت کا ہدف اگلے پانچ سالوں میں 18 لاکھ کروڑ روپے کی سرمایہ کاری کو راغب کرنا اور 50 لاکھ روزگار کے مواقع پیدا کرنا ہے۔ پدھومئی پین اور تمل پدھلون کے تحت کالج کے طلباء کو ماہانہ 1,500 روپے مالی مدد فراہم کی جائے گی اور 35 لاکھ مفت لیپ ٹاپ تقسیم کیے جائیں گے۔

کسانوں کے لیے اہم اعلان
کسانوں کے لیے منشور میں 20 لاکھ سے زائد مستفیدین کو میٹر فری جدید الیکٹرک پمپ سیٹ مفت فراہم کرنے کا وعدہ کیا گیا ہے۔ دھان کی خریداری کی قیمت 3,500 روپے فی کوئنٹل اور گنے کی قیمت 4,500 روپے فی ٹن مقرر کی جائے گی۔ دیگر اقدامات میں 10 لاکھ پکے گھر، 10,000 کروڑ روپے کی دیہاتی سڑکوں کے لیے فنڈز، چار عالمی معیار کے شہر اور 50 سیماوجی پونگا (روایتی رہائشی یونٹس) کی تعمیر شامل ہے۔

انتظامی اقدامات
وزیراعلیٰ ایم کے اسٹالن نے کہا کہ ‘اونگا کنوا سولنگا’ کے تحت عوام کی درخواستوں کو ترجیح دی جائے گی اور ‘انگالودان اسٹالن’ اور ‘نالم کاککم اسٹالن’ کیمپوں کے ذریعے گھر گھر خدمات پہنچائی جائیں گی۔ ایک ہی درخواست سے 1,000 سرکاری خدمات تک رسائی ممکن ہوگی۔ معذور افراد کی پینشن 2,500 روپے ماہانہ اور شدید متاثرہ افراد کے لیے 4,000 روپے ماہانہ کر دی جائے گی۔

انتخابات کی تیاری اور دعویٰ
تمل ناڈو میں انتخابات 9 اپریل کو ایک ہی مرحلے میں ہوں گے جبکہ نتائج 4 مئی کو اعلان کیے جائیں گے۔ اسٹالن نے دعویٰ کیا کہ ڈی ایم کے 234 میں سے 200 سے زائد نشستیں جیت کر اقتدار میں واپس آئے گی۔ انہوں نے کہا کہ یہ منشور نہیں بلکہ ریاست کے مستقبل کا روڈ میپ ہے، جو ہر شہری کے لیے ترقی اور فلاح کا ضامن ہوگا۔

بھارت ایکسپریس اردو۔