Directorate General of Civil Aviation: ڈی جی سی اے نے ایئر لائنز کو نو مغربی ایشیائی ممالک کے اوپر پرواز نہ کرنے کی دی ہدایت

نئی دہلی : ہندوستان کے ایوی ایشن ریگولیٹر، ڈائریکٹوریٹ جنرل آف سول ایوی ایشن (ڈی جی سی اے) نے ایئرلائنز کو ہدایت دی ہے کہ وہ ایران، امریکہ اور اسرائیل کے درمیان جاری کشیدگی کے باعث مغربی ایشیا کے 9 ممالک کی فضائی حدود استعمال نہ کریں۔ان ممالک میں بحرین، ایران، عراق، اسرائیل، اردن، کویت، لبنان، قطر اور متحدہ عرب امارات شامل ہیں۔ ڈی جی سی اے کے مطابق حالیہ فوجی کشیدگی نے شہری ہوابازی کے لیے خطرناک ماحول پیدا کر دیا ہے، خاص طور پر ایران پر امریکہ اور اسرائیل کے حملوں اور اس کے بعد ایران کی جوابی کارروائیوں نے خطرات میں مزید اضافہ کر دیا ہے۔

ایئرلائنز کو سخت حفاظتی اقدامات کی ہدایت

ڈی جی سی اے کی ہدایت کے مطابق مخصوص شرائط کے تحت عمان اور سعودی عرب کی فضائی حدود استعمال کی جا سکتی ہے، تاہم ایئرلائنز کو ان علاقوں میں 32 ہزار فٹ سے کم بلندی پر پرواز نہ کرنے کا مشورہ دیا گیا ہے۔ریگولیٹر نے ایئرلائنز کو ہدایت دی ہے کہ وہ ممکنہ رکاوٹوں جیسے روٹ میں تبدیلی سے نمٹنے کے لیے جامع سکیورٹی جائزہ اور مضبوط ہنگامی منصوبہ بندی کریں۔ یہ ہدایات فوری طور پر نافذ کر دی گئی ہیں اور 28 مارچ تک مؤثر رہیں گی، قابل ذکر بات یہ ہے کہ حالات کے مطابق اس میں تبدیلی کی جا سکتی ہے۔ڈی جی سی اے نے مزید کہا کہ ایئرلائنز کو تمام فلائٹ لیولز پر متاثرہ فضائی حدود سے گریز کرنا چاہیے اور متعلقہ ایئرپورٹس پر ہنگامی صورتحال سے نمٹنے کے مکمل انتظامات ہونے چاہئیں۔ اس کے علاوہ فلائٹ کریو کو تازہ ترین NOTAM سے باخبر رکھنا ضروری ہے، تاکہ فضائی پابندیوں اور آپریشنل صورتحال سے متعلق بروقت معلومات حاصل کی جا سکیں۔

بھارت ایکسپریس اردو