Delhi NCR Weather Deteriorates again: دہلی-این سی آر میں گردوغبار اورتیز آندھی، بارش کے آثار، کب تک ایسا رہے گا موسم؟

نئی دہلی: دہلی-این سی آرمیں دودنوں سے موسم کافی خراب ہے۔ کہیں تیزآندھی آرہی ہے توکہیں بارش ہورہی ہے۔ گزشتہ جمعرات کو جہاں نوئیڈا، غازی آباد سمیت مغربی یوپی کے کئی اضلاع میں تیزدھول بھری آندھی اوربارش ہوئی تھی تووہیں جمعہ کوبھی دیرشام تیزآندھی آئی۔ تیزآندھی کے ساتھ ہلکی پھلکی بارش بھی شروع ہوگئی۔ محکمہ موسمیات نے بھی پیشین گوئی کی تھی کہ جمعہ کے روزدہلی-این سی آرمیں ایسا ہی موسم بنا رہے گا۔ محکمہ موسمیات کا اندازہ صحیح نکلا اورجمعہ کواچانک موسم خراب ہوگیا۔

وہیں، دہلی میں بھی نجف گڑھ، پالم، دوارکا، اتم نگر، مہیپال پور، دھولا کنواں اورایئرپورٹ سمیت کئی علاقوں میں دھول بھری آندھی چلی۔ اس سے راستوں سے جارہے لوگوں کی گاڑیوں کی رفتارتھم گئی۔ لوگ سڑک کے کنارے اپنی اپنی گاڑی کھڑی کرکے آندھی رکنے کا انتظارکرنے لگے۔ کم وبیش یہی صورتحال نوئیڈا میں بھی رہی۔ تیزدھول بھری آندھی نے سڑکوں پرگاڑیوں کی رفتارتھم گئی۔ لوگوں کا پیدل چلنا مشکل ہوگیا۔ نوئیڈا کے بیشتر حصوں میں بجلی گل ہوگئی۔

اس کے ساتھ ہی ہریانہ کے کروشیتر، کیتھل، نروانا، راجوند، اسندھ، بروالا، جیند، حصار، ہانسی، مہم، توشام، بھیوانی، چرخی دادری، مٹنہیل، کوسلی، مہندرگڑھ، نارنول اوراترپردیش کے گنگوہ، مظفرنگر، سادہ آباد اورراجستھان کے کوٹ پتلی، لکشمن گڑھ میں آئندہ دو گھنٹوں کے اندر ہلکی سی تیز بارش ہونے کا امکان ہے۔

دہلی-این سی آر کے کئی علاقوں میں جمعہ کی صبح بادل چھائے رہے۔ محکمہ موسمیات نے پہلے ہی آندھی چلنے اور ہلکی بارش کا خدشہ ظاہرکیا تھا۔ وہیں دہلی کے کئی علاقوں میں جمعرات کی رات ہلکی بوندا باندی ہوئی اور درجہ حرارت 22.8 ڈگری سیلسیس درج کی گئی، جو اس موسم کے اوسط درجہ حرارت سے 1.8 ڈگری زیادہ تھا۔ بوندا باندی سے درجہ حرارت میں کچھ کمی آئی، جس سے لوگوں کوگزشتہ چند دنوں سے یہاں جاری شدید گرمی سے راحت ملی۔

دہلی میں پیرکے روز زیادہ سے زیادہ درجہ حرارت اس سیزن میں پہلی بار40 ڈگری سیلسیس سے تجاوزکرگیا، مسلسل تین دنوں تک شدید گرمی کی کیفیت جاری رہی۔ گزشتہ بدھ کو تین سال کی گرم ترین رات ریکارڈ کی گئی اورکم ازکم درجہ حرارت 25.9 ڈگری سیلسیس تک پہنچ گیا۔ تاہم جمعرات کو ہونے والی ہلکی بارش سے موسم خوشگوارہوگیا اورلوگوں کوگرمی سے کافی راحت ملی۔

بھارت ایکسپریس اردو-