Delhi News: دہلی میں غیر قانونی ای رکشوں پر کارروائی، محکمہ ٹرانسپورٹ نے 114 رکشوں کو جے سی بی سے کیا کریش

دہلی کی سڑکوں پر چلنے والے غیر قانونی ای-رکشا ڈرائیوروں پر شکنجہ کستے ہوئے محکمہ ٹرانسپورٹ نے 114 ای-رکشوں کو بربادکر دیا ہے۔ مسلسل شکایات موصول ہونے کے بعد محکمہ ٹرانسپورٹ نے غیر قانونی طور پر چلنے والے ای رکشوں کو ضبط کر لیا تھا اور انہیں براری میں جمع کیا تھا اور گزشتہ جمعہ کو جے سی بی سے انہیں کچل دیا تھا۔

مسلسل واقعات کے بعد محکمہ ٹرانسپورٹ نے اپنی پوری توجہ غیر قانونی ای رکشوں پر مرکوز کر دی ہے۔ دہلی میں تقریباً 1 لاکھ 60 ہزار ای-رکشے چلتے ہیں، جن میں بڑی تعداد میں غیر قانونی ای-رکشا شامل ہیں، جن کے پاس نہ لائسنس ہے اور نہ ہی پرمٹ۔

 ای رکشے دہلی کی سڑکوں پر خطرناک طریقے سے چلتے ہیں، جس سے لوگوں کی زندگیاں خطرے میں پڑ جاتی ہیں۔ اس کے علاوہ ای رکشہ ڈرائیوروں کی جانب سے سڑکوں پر مکمل قبضہ کرنے کی مسلسل شکایات موصول ہورہی تھیں۔

بجلی چوری کی شکایات بھی موصول ہوئی ہیں۔

ایک ای رکشہ کو چارج کرنے میں 8 سے 10 یونٹ خرچ ہوتے ہیں، لیکن یہ رکشہ مافیا بجلی کے کھمبوں سے بجلی چوری کرکے رکشوں کو چارج کرتے ہیں، جس کی وجہ سے حال ہی میں دہلی میں کئی حادثات ہوئے ہیں اور ای رکشا میں کرنٹ لگنے سے اموات ہوئی ہیں۔ ایک سال کا بچہ اور ایک 40 سالہ شخص چلتے چلتے دم توڑ گیا۔

بھارت ایکسپریس۔