Cultural tourism in India to grow significantly in 2025- Report: بھارت میں 2025 کے دوران ثقافتی سیاحت میں نمایاں اضافہ- رپورٹ

بین الاقوامی سفری ایپ اسکائی اسکینر نے حال ہی میں ایک نئی رپورٹ جاری کی ہے ،جس کا عنوان ہے “ثقافتی سیاحت کی رپورٹ 2025″۔ اس رپورٹ میں بھارتی سیاحوں کے بدلتے رجحانات کو اُجاگر کیا گیا ہے۔ رپورٹ کے مطابق اب بھارتی سیاح محض سیر و تفریح کے بجائے زیادہ بامعنی تجربات کے خواہشمند ہیں، جن میں ثقافت، آرام، عیش و عشرت اور فرصت کا حسین امتزاج شامل ہو۔
نوجوان نسل کا بڑھتا رجحان
رپورٹ میں انکشاف کیا گیا ہے کہ 82 فیصد بھارتی شہری 2025 میں اپنے سفر کا منصوبہ کسی خطے کی ثقافتی سرگرمیوں کی بنیاد پر بنا رہے ہیں۔ حیرت انگیز بات یہ ہے کہ اس تبدیلی کی قیادت نوجوان نسل کر رہی ہے 84 فیصد ملینیئلز اور 80 فیصد جنریشن زی کے مسافر اپنے سفر کا مرکز ثقافتی تجربات کو بنا رہے ہیں۔
سفری رجحانات میں ابھرتی تبدیلیاں
اسکائی اسکینر کے مطابق بھارتی سیاحوں کی دلچسپی کا سب سے بڑا مرکز ملکی تہوار بنتے جا رہے ہیں۔ رپورٹ کے مطابق76 فیصد بھارتی اپنی سفری منصوبہ بندی ملک کے بڑے تہواروں کے گرد کر رہے ہیں۔93 فیصد سیاح کم معروف مگر ثقافتی لحاظ سے مالامال علاقوں کا رخ کر رہے ہیں تاکہ اصل روایات کا تجربہ کیا جا سکے۔
اس کے علاوہ:53 فیصد سیاح جے پور اور وارانسی جیسے تاریخی شہروں کی جانب متوجہ ہو رہے ہیں۔39 فیصد سیاح یونیسکو کے عالمی ورثہ مقامات، جیسے تاج محل اور ہمپی، کو اپنی ترجیح بنا رہے ہیں۔وارانسی کی تلاش میں اس سال 76 فیصد اضافہ دیکھا گیا ہے۔
نمایاں ثقافتی مقامات
1. کولکاتا (دُرگا پوجا)
دُرگا پوجا کے دوران کولکاتا ایک نئی زندگی اختیار کر لیتا ہے۔ شہر میں عارضی مندر، فن پارے، موسیقی، رقص، کھانے کے اسٹال اور جشن کا سماں ہر طرف ہوتا ہے۔
2. برسانا (ہولی)
برسانا کی ہولی ایک منفرد روایتی انداز میں منائی جاتی ہے، جہاں خواتین مردوں کو لاٹھیوں سے کھیل ہی کھیل میں مارتی ہیں۔ موسیقی، ہنسی مذاق اور رنگوں کی بہار اس تہوار کو یادگار بنا دیتی ہے۔
3. کیرالا (اونم)
اونم کیرالا کا سب سے بڑا تہوار ہے۔ پھولوں سے سجائے گئے آنگن، کیلے کے پتوں پر پیش کیے جانے والے کھانے اور سانپ کشتیوں کی دوڑ، اس ریاست کی ثقافت کی بھرپور عکاسی کرتے ہیں۔
4. جے پور
جے پور اپنی شاندار عمارتوں، محلات، قلعوں اور بازاروں کی وجہ سے سیاحوں کو ماضی کی شاہانہ زندگی میں لے جاتا ہے۔ یہاں کی گلیاں، دستکاری اور رنگ برنگی ثقافت دل کو موہ لیتی ہیں۔
5. وارانسی
دنیا کے قدیم ترین شہروں میں سے ایک، وارانسی کا سارا نظام زندگی دریائے گنگا کے گرد گھومتا ہے۔ صبح کی پراتھنایں، شام کی آرتیاں، تنگ گلیاں اور قدیم مندر اس شہر کو روحانی رنگ دیتے ہیں۔
6. آگرہ
تاج محل کے علاوہ، آگرہ مغلیہ دور کے قلعوں، مقبروں اور بازاروں کی بدولت بھی سیاحوں کے لیے پرکشش ہے۔
7. ہمپی
ہمپی، جو ایک یونیسکو عالمی ورثہ مقام ہے، ماضی کی شان و شوکت کا آئینہ دار ہے۔ یہاں کے کھنڈر، مندروں کے آثار اور پتھریلے مناظر اسے منفرد بناتے ہیں۔
دیگر اہم رجحانات
• 40 فیصد سیاح ثقافتی دیہات یا ماحول دوست ثقافتی کمیونٹیز کی تلاش میں ہیں۔
• 38 فیصد سیاح روایتی اور تاریخی کھانوں میں دلچسپی رکھتے ہیں۔
• 45 فیصد پر سوشل میڈیا کا گہرا اثر ہے،
• 39 فیصد دوستوں اور خاندان سے متاثر ہوتے ہیں،
• 27 فیصد سفری ایپس کے ذریعے منصوبہ بندی کرتے ہیں۔
• 41 فیصد لوگ اپنا سفر ایک سے دو ماہ قبل پلان کرتے ہیں۔

بھارت ایکسپریس اردو