I.N.D.I.A. الائنس میں کیسے فائنل ہوں گی کانگریس کی سیٹیں؟ الائنس کمیٹی کی میٹنگ میں طے کیا گیا سیٹ شیئرنگ کا فارمولہ

Lok Sabha Election 2024: کانگریس نے حال ہی میں انڈیا الائنس میں شامل جماعتوں کے ساتھ آئندہ عام الیکشن کے لئے سیٹوں کی تقسیم کے نظام پرتبادلہ خیال کرنے کے لئے پانچ رکنی نیشنل الائنس کمیٹی کی تشکیل کی تھی۔ اس کمیٹی نے سیٹ تقسیم سے پہلے الگ الگ ریاستی کانگریس کے سینئر لیڈران کے ساتھ تبادلہ خیال کرنے کا فیصلہ کیا ہے۔

اس کے لئے قومی اتحاد کمیٹی (نیشنل الائنس کمیٹی) پارٹی کے یوم تاسیس یعنی 28 دسمبر کو ہونے والی ناگپور ریلی کے بعد ریاستی یونٹوں سے فیڈ بیک لے گی۔ اتنا ہی نہیں ریاست کے سینئر لیڈران کے ساتھ تبادلہ خیال کے بعد کمیٹی جنوری کے پہلے ہفتے میں اتحادی جماعتوں کے ساتھ سیٹوں کی تقسیم پر فائنل بات کرے گی۔

5 رکنی کمیٹی کی تشکیل

اس سے پہلے پارٹی نے منگل (19 دسمبر) کو آئندہ لوک سبھا الیکشن کے لئے اس 5 رکنی کمیٹی کی تشکیل کی تھی۔ اس کمیٹی کی صدارت موہن پرکاش کریں گے۔ کمیٹی میں دو سابق وزرائے اعلیٰ اشوک گہلوت اور بھوپیش بگھیل کو بھی شامل کیا گیا ہے۔ اس کے علاوہ سابق مرکزی وزیر سلمان خورشید اور مکل واسنک کو بھی کمیٹی کا حصہ بنایا گیا ہے۔ کمیٹی کا مقصد 2024 کے پارلیمانی الیکشن کے لئے سیٹ شیئرنگ سے متعلق اتحاد میں شامل سیاسی جماعتوں کے ساتھ بات چیت کرنا ہے۔

کانگریس نے انتخابی منشور کمیٹی بنائی

اس کے علاوہ کانگریس نے لوک سبھا الیکشن 2024 کی تیاریوں کے پیش نظرجمعہ (22 دسمبر) کو انتخابی منشور کمیٹی کی تشکیل کی۔ اس کمیٹی کی قیادت پی چدمبرم کریں گے۔ جبکہ چھتیس گڑھ کے سابق نائب وزیراعلیٰ ٹی ایس سنگھ دیو کو اس کا کنوینر بنایا گیا ہے۔ اس کمیٹی میں پرینکا گاندھی، سدارمیا اور ششی تھرور جیسے لیڈران کو بھی شامل کیا گیا ہے۔ قابل ذکرہے کہ حال میں مدھیہ پردیش، راجستھان اور چھتیس گڑھ اسمبلی الیکشن میں ملی ہار کے بعد کانگریس آئندہ سال ہونے والے لوک سبھا الیکشن کی تیاریوں میں مصروف ہوگئی ہے۔ اس ضمن میں کانگریس اعلیٰ کمان نے اترپردیش، اوڈیشہ اور مغربی بنگال میں پارٹی کے لیڈران کی میٹنگ کی۔