AP P4 Initiative: آندھرا پردیش کی پی 4 پہل سے اڈانی فاؤنڈیشن کی وابستگی، نائیڈو حکومت کے ساتھ مل کر کمزور خاندانوں کی روزی روٹی مستحکم بنانے کا عزم

کپّم (آندھرا پردیش): اڈانی فاؤنڈیشن نے پیر کو آندھرا پردیش حکومت کی اہم پبلک-پرائیویٹ-پیپل پارٹنرشپ (P4) پہل میں “مارگ درشی” (رہنمائی اور معاون شراکت دار) کی حیثیت سے شمولیت اختیار کرتے ہوئے ضلع چتور کے کپّم منڈل میں معاشی طور پر کمزور خاندانوں، جنہیں “بنگارو کٹمبم” کہا جاتا ہے، کی روزی روٹی مضبوط بنانے کے لیے حکومت کے ساتھ اشتراک کیا ہے۔

29 گرام پنچایتوں اور شہری علاقوں کا احاطہ

’’ٹرانسفارمنگ لائیوز ٹوگیدر: اے پی 4 ماڈل فار ہولسٹک پروگریس آف بنگارو کٹمبمز اِن کپّم منڈل‘‘ کے عنوان سے شروع کی گئی اس پہل کے تحت کپّم منڈل کی تمام 29 گرام پنچایتوں اور شہری علاقوں کو شامل کیا جائے گا۔ اس منصوبے کا مقصد مقامی ضروریات کے مطابق روزگار کے مواقع میں اضافہ، خاندانوں کی آمدنی بہتر بنانا، مالی خواندگی کو فروغ دینا اور انہیں مختلف سرکاری فلاحی اسکیموں سے جوڑنا ہے۔ اس منصوبے پر عمل درآمد آندھرا پردیش مہیلا ابھی وردھی سوسائٹی (APMAS) کرے گی۔

خود روزگاری کے لیے وسائل فراہم کیے جائیں گے

اس پروگرام کے تحت مستفید خاندانوں کو ان کی صلاحیت اور مقامی بازار کی ضرورت کے مطابق روزگار سے متعلق وسائل فراہم کیے جائیں گے، جن میں سلائی مشینیں، پورٹیبل ویلڈنگ کِٹ، کڑھائی مشینیں، مویشی پروری، کریانہ دکانوں اور دیگر چھوٹے کاروباروں کے قیام کے لیے تعاون شامل ہے، تاکہ خاندان مستقل آمدنی حاصل کر سکیں۔ ہر خاندان کو تربیت یافتہ کمیونٹی رہنماؤں، جنہیں ’بنگارو متر‘ کہا جائے گا، کی مدد حاصل ہوگی۔ یہ رہنما کاروباری منصوبہ بندی، مالی خواندگی، کاروبار کی ترقی اور مختلف سرکاری اسکیموں سے استفادہ کرنے میں خاندانوں کی رہنمائی کریں گے۔

چندرابابو نائیڈو نے مستحق خاندانوں میں آلات تقسیم کیے

آندھرا پردیش کے وزیراعلیٰ این۔ چندرابابو نائیڈو نے اپنے اسمبلی حلقہ کپّم کے دورے کے دوران منتخب مستحق خاندانوں میں سلائی مشینیں، پورٹیبل ویلڈنگ کِٹ اور کڑھائی مشینیں تقسیم کیں۔ انہوں نے کہا کہ یہ پہل ریاست کی پی 4 زیرو پاورٹی مہم کے وژن کو مضبوط کرتی ہے اور اڈانی فاؤنڈیشن کی جانب سے محروم خاندانوں کے لیے قیادت کی صلاحیت پیدا کرنے اور پائیدار روزگار کے مواقع فراہم کرنے کی کوشش قابلِ ستائش ہے۔ وزیراعلیٰ نے کہا کہ بنگارو کٹمبم خاندانوں کو خود کفیل بنانے اور پائیدار روزگار فراہم کرنے کے لیے اڈانی فاؤنڈیشن کا عزم مشترکہ سماجی ذمہ داری کی بہترین مثال ہے، جو معاشرے پر طویل مدتی مثبت اثرات مرتب کرے گا۔

ڈاکٹر پریتی اڈانی کا اظہار خیال

اڈانی فاؤنڈیشن کی چیئرپرسن ڈاکٹر پریتی اڈانی نے کہا کہ پائیدار ترقی کا آغاز خاندان سے ہوتا ہے۔ جب خاندانوں کو مواقع، مناسب رہنمائی اور خود انحصاری کا اعتماد ملتا ہے تو وہ نہ صرف اپنی بلکہ آنے والی نسلوں کا مستقبل بھی روشن بناتے ہیں۔ انہوں نے کہا کہ آندھرا پردیش حکومت کے ساتھ پی 4 پہل کے تحت یہ شراکت داری بنگارو کٹمبم خاندانوں کو خود کفیل بنانے کے مشترکہ عزم کی علامت ہے اور اس کے ذریعے معاشی طور پر مستحکم اور بااختیار معاشرے کی تشکیل میں مدد ملے گی۔

بھارت ایکسپریس اردو۔