West Bengal Politics: ممتا بنرجی کی رہائش گاہ پر پہنچی سی آئی ڈی کی ٹیم، ابھیشیک بنرجی بھی تحقیقات کے دائرے میں

کولکاتا: مغربی بنگال کی جرائم تفتیشی محکمہ (CID) کی ایک ٹیم منگل کے روز ترنمول کانگریس (ٹی ایم سی) کی سربراہ اور سابق وزیراعلیٰ ممتابنرجی کی کولکاتا میں واقع رہائش گاہ پر پہنچی۔ ممتا بنرجی اس وقت نئی دہلی میں ہیں، جہاں انہوں نے گزشتہ روز انڈیا بلاک کی اہم میٹنگ میں شرکت کی تھی۔ گزشتہ ہفتے سی آئی ڈی کی ایک ٹیم ٹی ایم سی کے قومی جنرل سکریٹری ابھیشیک بنرجی کی رہائش گاہ پر بھی پہنچی تھی۔ یہ کارروائی مبینہ دستخط جعلسازی (Signature Forgery) کیس کے سلسلے میں کی گئی تھی۔ اس معاملے کی تحقیقات کے لیے ریاستی سی آئی ڈی نے پانچ رکنی خصوصی تحقیقاتی ٹیم (SIT) تشکیل دی ہے، جو ترنمول کانگریس کے اراکین اسمبلی کے دستخطوں میں مبینہ جعلسازی کی جانچ کر رہی ہے۔ حکام کے مطابق ابھیشیک بنرجی کو پارٹی عہدیداروں کی تقرری سے متعلق مغربی بنگال اسمبلی کے اسپیکر کو بھیجی گئی اصل قرارداد (Resolution) کی نقل پیش کرنے کے لیے کہا گیا ہے۔

13 اراکین اسمبلی کے بیانات قلم بند

پولیس ذرائع کے مطابق مغربی بنگال پولیس کے ایک ڈپٹی انسپکٹر جنرل (DIG) کی سربراہی میں ایس آئی ٹی اس معاملے کی مکمل تحقیقات کر رہی ہے۔ اب تک سی آئی ڈی 13 ٹی ایم سی اراکین اسمبلی کے بیانات ریکارڈ کر چکی ہے۔ حکام نے بتایا کہ تین اراکین اسمبلی نے دعویٰ کیا ہے کہ 6 مئی کی میٹنگ ریزولوشن بک میں موجود دستخط ان کے نہیں ہیں۔ اسی طرح کینگ پوربا سے تعلق رکھنے والے ایک رکن اسمبلی نے بیان دیا کہ وہ کولکاتا میں منعقدہ مذکورہ اجلاس میں شریک ہی نہیں ہوئے تھے۔

قرارداد اور حاضری رجسٹر پر اٹھے سوالات

تحقیقات کے دوران سی آئی ڈی نے ابھیشیک بنرجی سے اصل میٹنگ ریزولوشن بک پیش کرنے کو کہا۔ اس سے قبل 9 مئی کو انہوں نے اسمبلی اسپیکر کو مطلع کیا تھا کہ پارٹی عہدیداروں کی تقرری کا فیصلہ آل انڈیا ترنمول کانگریس (AITC) کی مقننہ پارٹی کے اجلاس میں کیا گیا تھا۔ بعد ازاں 18 مئی کو مغربی بنگال اسمبلی کے پرنسپل سکریٹری نے اجلاس کی کارروائی، قرارداد اور اس میں شریک اراکین اسمبلی کے دستخط طلب کیے تھے۔ 20 مئی کو ابھیشیک بنرجی نے ایک قرارداد کی نقل اور حاضری شیٹ جمع کرائی، جس میں دعویٰ کیا گیا تھا کہ 6 مئی کے اجلاس میں 70 اراکین اسمبلی شریک ہوئے تھے۔

دو اراکین اسمبلی کی شکایت کے بعد کیس درج

27 مئی کو ٹی ایم سی کے دو اراکین اسمبلی رٹابراتا بنرجی اور سندیپن ساہا نے اسمبلی اسپیکر کے سامنے شکایت درج کرائی تھی کہ 6 مئی کو قائد حزب اختلاف (LoP) کے انتخاب سے متعلق کوئی قرارداد منظور نہیں ہوئی تھی اور انہوں نے میٹنگ ریزولوشن بک پر دستخط 19 مئی کو کیے تھے۔ شکایت میں یہ الزام بھی عائد کیا گیا کہ 6 مئی کی قرارداد ’’من گھڑت اور جعلی‘‘ تھی اور اس میں 14 دستخط بلاک لیٹرز میں درج تھے۔ بعد میں ترنمول کانگریس نے دونوں اراکین اسمبلی کو مبینہ طور پر پارٹی مخالف سرگرمیوں کے الزام میں معطل کر دیا۔

دھوکہ دہی اور جعلسازی کے تحت مقدمہ درج

اسمبلی کے پرنسپل سکریٹری کی شکایت کی بنیاد پر ہرے اسٹریٹ پولیس اسٹیشن میں 27 مئی کو بھارتیہ نیائے سنہتا (BNS) کی مختلف دفعات کے تحت دھوکہ دہی، جعلسازی اور مجرمانہ سازش کا مقدمہ درج کیا گیا تھا۔ اگلے روز، 28 مئی کو، اس مقدمے کی تحقیقات سی آئی ڈی کے سپرد کر دی گئی تھیں، جس کے بعد سے معاملے کی جانچ مسلسل جاری ہے۔

بھارت ایکسپریس اردو۔