Wang Yi’s India visit: ’عملی تعاون بڑھانے‘ اور ’سیاسی باہمی اعتماد کو مضبوط کرنے‘ کے لیے ہورہا ہے وزیر خارجہ وانگ ای کا بھارت دورہ: چین

بیجنگ: چین نے پیر کو کہا کہ وہ وزیرِ خارجہ وانگ ای کے دورۂ ہند اور سرحدی تنازع پر خصوصی نمائندوں کے مابین ہونے والے آئندہ 24ویں مذاکرات کو دونوں ممالک کے تعلقات کو بہتر بنانے کے ایک موقع کے طور پر دیکھ رہا ہے۔

چین کا مؤقف

چینی وزارت خارجہ کی ترجمان ماؤ ننگ نے کہا: ’’چین وانگ ای کے دورۂ ہند کو ایک موقع کے طور پر استعمال کرنے کا خواہاں ہے تاکہ بھارت کے ساتھ مل کر دونوں ملکوں کے رہنماؤں کے درمیان طے پائے گئے اہم اتفاقِ رائے کو نافذ کیا جائے، اعلیٰ سطحی رابطوں کی رفتار کو برقرار رکھا جائے، سیاسی باہمی اعتماد کو بڑھایا جائے، عملی تعاون کو مضبوط کیا جائے، اختلافات کو مناسب انداز میں سنبھالا جائے اور چین-بھارت تعلقات کو پائیدار، صحت مند اور مستحکم ترقی کی طرف بڑھایا جائے۔‘‘

دورے کی تفصیلات

وزارت خارجہ (MEA) کے مطابق چینی وزیرِ خارجہ وانگ ای 18 سے 19 اگست تک بھارت کا دورہ کریں گے۔ وہ قومی سلامتی کے مشیر (این ایس اے) اجیت ڈووال سے سرحدی مسئلے پر خصوصی نمائندوں کی 24ویں دور کی بات چیت کریں گے۔ اس دوران بھارتی وزیرِ خارجہ ایس جے شنکر بھی وانگ ای کے ساتھ دوطرفہ ملاقات کریں گے۔

ایم ای اے کے بیان میں کہا گیا ہے کہ: ’’این ایس اے اجیت ڈوول کی دعوت پر چین کی کمیونسٹ پارٹی کی پولٹ بیورو کے رکن اور وزیر خارجہ محترم وانگ ای 18-19 اگست کو بھارت کا دورہ کریں گے۔ اپنے دورے میں وہ بھارت کے خصوصی نمائندے این ایس اے اجیت ڈوول کے ساتھ بھارت-چین سرحدی سوال پر 24ویں دور کی بات چیت کریں گے۔ وزیر خارجہ ڈاکٹر ایس جے شنکر بھی وانگ ای سے دوطرفہ ملاقات کریں گے۔‘‘

ایس سی او اجلاس اور مستقبل کی پیش رفت

یہ دورہ وزیراعظم نریندر مودی کے آئندہ دورۂ چین سے قبل ہو رہا ہے۔ مودی 31 اگست سے یکم ستمبر تک تیانجن میں شنگھائی تعاون تنظیم (SCO) کے اجلاس میں شرکت کریں گے۔ حالیہ مہینوں میں بھارت اور چین کے تعلقات میں بہتری کے لیے کئی اہم اقدامات دیکھنے میں آئے ہیں، جن میں دونوں ملکوں کے وزرائے خارجہ کے درمیان ملاقاتیں بھی شامل ہیں۔ دوسری جانب، چین 31 اگست سے یکم ستمبر تک ایس سی او اجلاس کی میزبانی کرے گا جس میں 20 سے زائد ممالک کے رہنما، تمام رکن ریاستوں کے سربراہان اور 10 بین الاقوامی تنظیموں کے نمائندے شریک ہوں گے۔ وزارت خارجہ ہند نے وزیراعظم کے دورۂ چین پر تاحال کوئی باضابطہ بیان جاری نہیں کیا۔

بھارت ایکسپریس اردو۔