Adani urges India to fight for technological freedom: تکنیکی آزادی کی جدوجہد پر زور — مصنوعی ذہانت نئے عالمی طاقت کے توازن کو بدل دے گی، آئی آئی ٹی کھڑگپور میں گوتم اڈانی کا طلبا سے خطاب

اڈانی گروپ کے چیئرمین گوتم اڈانی نے پیر کے روز آئی آئی ٹی کھڑگپور کی پلاٹینم جوبلی تقریب سے خطاب کرتے ہوئے خبردار کیا کہ مصنوعی ذہانت (اے آئی) دنیا بھر کی مسابقت کو ہلا کر رکھ دے گی اور ممالک و کمپنیوں کے درمیان طاقت کے توازن کو نئے سرے سے متعین کرے گی۔ انہوں نے کہا کہ بھارت کو تکنیکی خودکفالت کو اپنی ’’دوسری آزادی کی جدوجہد‘‘ بنانا چاہیے تاکہ ملک اپنے مستقبل پر دوسروں کا انحصار نہ کرے۔

خود انحصاری کو دوسری آزادی قرار دیا

اڈانی نے طلبہ کو مخاطب کرتے ہوئے کہا کہ سیاسی آزادی بھارت نے 1947 میں حاصل کرلی تھی لیکن آج بھی سیمی کنڈکٹرز، توانائی اور دفاعی نظام کے معاملے میں بھارت غیر ممالک پر انحصار کرتا ہے۔ تقریباً 90 فیصد چپس درآمد کی جاتی ہیں، جو کسی بھی وقت پابندیوں یا سپلائی میں رکاوٹ کی وجہ سے بحران پیدا کرسکتی ہیں۔ ’’آپ کی ایجادات، آپ کا سافٹ ویئر کوڈ اور آپ کے خیالات آج کے ہتھیار ہیں۔‘‘

مصنوعی ذہانت کا چیلنج اور صنعتوں کی تباہی کا خدشہ

انہوں نے کہا کہ جیسے جیسے اے آئی خود اے آئی تخلیق کرنے لگے گی، روبوٹ روبوٹ تیار کریں گے اور مشینیں مشینوں کو سکھائیں گی، سبھی صنعتیں اور تعلیمی نظام متاثر ہوں گے۔ اگر ملک کو آگے بڑھنا ہے تو اسے اختراعی ٹیکنالوجیز اور دانشورانہ املاک کی تخلیق میں قیادت کرنی ہوگی۔

کارپوریٹ سیکٹر پر تنقید اور نئی اسکیم کا اعلان

اڈانی نے اعتراف کیا کہ نجی شعبے نے ریسرچ اور اختراعات میں پیچھے رہ کر صرف حکومت کے اداروں جیسے اسرو اور ڈی آر ڈی او پر انحصار کیا ہے۔ انہوں نے کہا کہ ’’اگر ہم کارپوریٹس آگے نہ بڑھے تو ہمیشہ دوسروں کی ایجادات کے محتاج رہیں گے‘‘۔ اس موقع پر انہوں نے ’’اڈانی–آئی آئی ٹی پلاٹینم جوبلی چینج میکرز فیلوشپ‘‘ کے آغاز کا اعلان کیا تاکہ تمام آئی آئی ٹیز میں نمایاں طلبہ کو توانائی، لاجسٹکس اور اسمارٹ موبلٹی جیسے اہم شعبوں میں تحقیقی منصوبوں کی طرف راغب کیا جا سکے۔

مستقبل کی صنعتوں میں اے آئی کے مواقع

انہوں نے مثال دی کہ گجرات کے کھوڈا میں اڈانی گروپ کے 30 گیگا واٹ کے قابل تجدید توانائی پارک میں طلبہ اے آئی پر مبنی گرڈ بیلنسنگ اور مینٹیننس ٹولز تیار کرسکتے ہیں۔ اڈانی پورٹس میں الگوردھم بیرتھ شیڈولنگ اور خودکار کنٹینر ہینڈلنگ کو ممکن بناسکتے ہیں جبکہ اڈانی ایئرپورٹس پر اے آئی ہجوم کی پیش گوئی، بیگیج ہینڈلنگ اور توانائی کے بہتر استعمال میں مدد دے سکتی ہے۔

طلبہ سے ملک کے مستقبل کی ذمہ داری لینے کی اپیل

خطاب کے اختتام پر اڈانی نے نوجوانوں کو نصیحت کی کہ وہ بیرونی ملازمت کے بجائے بھارت کی تعمیر میں حصہ لیں۔ انہوں نے کہا: ’’آپ بھارت کے نئے مجاہدین آزادی ہیں۔ اسی کھڑگپور کی زمین پر کبھی نوجوانوں نے برطانوی غلامی کے خلاف قربانی دی تھی۔ آج آپ کے خیالات ہتھیار ہیں اور آپ کی ایجادات گولیوں کی مانند ہیں۔‘‘

انہوں نے طلبہ کو یاد دلایا کہ وہ دو راستوں کے درمیان انتخاب کریں گے، ایک آسان زندگی اور بیرونی نوکری کی راہ، دوسرا ملک کی تعمیر اور نئی آزادی کی جدوجہد کا راستہ۔  انہوں نے مزید کہا کہ ’’ایک ٹرین آپ کو تنخواہ تک لے جائے گی، دوسری ٹرین آپ کو وراثت اور بھارت کی سربلندی تک پہنچائے گی۔‘‘

بھارت ایکسپریس اردو۔