Kerala CM Oath Ceremony: کیرالہ میں نئی حکومت کا آغاز آج، وی ڈی ستیشن وزیر اعلیٰ کے عہدے کا لیں گے حلف

نئی دہلی :کیرالہ میں نئی حکومت کی تشکیل کا عمل آج باضابطہ طور پر شروع ہونے جا رہا ہے، جہاں وزیر اعلیٰ منتخب کیے گئے وی ڈی ستیشن پیر کے روز اپنے عہدے کا حلف لیں گے۔ نئی حکومت 21 رکنی کابینہ کے ساتھ اقتدار سنبھالے گی، جس میں وزیر اعلیٰ سمیت مختلف اہم وزارتوں کے قلمدان تقسیم کیے جائیں گے۔ ریاست میں سیاسی سرگرمیاں عروج پر ہیں اور مختلف اتحادی جماعتوں کے درمیان وزارتوں کی تقسیم کو لے کر مشاورت کا سلسلہ جاری ہے۔سیاسی ذرائع کے مطابق کانگریس کو وزیر اعلیٰ کے عہدے سمیت مجموعی طور پر 11 وزارتیں ملنے کا امکان ہے۔ اگرچہ پارٹی کے کئی ناموں پر تقریباً اتفاق رائے ہو چکا ہے، قابل ذکر بات یہ ہے کہ اتحادی جماعتوں کے نمائندوں کو کابینہ میں شامل کرنے کے معاملے پر ابھی بھی گفتگو جاری ہے۔

کانگریس کی جانب سے جن سینئر لیڈروں کے نام تقریباً طے مانے جا رہے ہیں، ان میں رمیش چنیتھلا سرفہرست ہیں۔ توقع کی جا رہی ہے کہ انہیں وزارت داخلہ کا قلمدان دیا جا سکتا ہے۔ اس کے علاوہ سنی جوزف، کے مرلی دھرن، تروونچور رادھا کرشنن، اے پی انل کمار، پی سی وشنو ناتھ، ایم لیجو، چانڈی اومن اور بندو کرشنا کے نام بھی ممکنہ وزراء کی فہرست میں شامل ہیں۔ذرائع کا کہنا ہے کہ وزیر اعلیٰ وی ڈی ستیشن خود اپنے پاس مالیات جیسی اہم وزارت رکھ سکتے ہیں۔ تاہم وزارتوں کی حتمی تقسیم کابینہ کی فہرست کو باضابطہ منظوری ملنے کے بعد ہی کی جائے گی۔

دوسری جانب اتحادی جماعت انڈین یونین مسلم لیگ (آئی یو ایم ایل) کو نئی حکومت میں پانچ وزارتیں ملنے کا امکان ظاہر کیا جا رہا ہے۔ پارٹی کی جانب سے جن ناموں پر سنجیدگی سے غور کیا جا رہا ہے، ان میں پی کے کنہالی کٹی، کے ایم شاجی، این شمس الدین اور پراککل عبداللہ شامل ہیں۔ اطلاعات کے مطابق پی کے بشیر کو کابینہ میں شامل کرنے کے معاملے پر پارٹی کے اندر اختلافات سامنے آئے ہیں۔ پارٹی کا ایک دھڑا ان کی ممکنہ ترقی اور وزارت دیے جانے پر اعتراضات ظاہر کر رہا ہے، جس کے باعث اس معاملے پر حتمی فیصلہ ابھی باقی ہے۔

کیرالہ میں نئی حکومت کے قیام کو ریاستی سیاست میں ایک اہم موڑ کے طور پر دیکھا جا رہا ہے۔ وی ڈی ستیشن کی قیادت میں بننے والی اس حکومت سے عوام کو بہتر انتظامیہ، ترقیاتی منصوبوں اور سیاسی استحکام کی امیدیں وابستہ ہیں۔ حلف برداری کی تقریب میں مختلف سیاسی جماعتوں کےلیڈر، سماجی شخصیات اور اعلیٰ حکام شرکت کریں گے۔

بھارت ایکسپریس ارد و