رائے پور: ریاست چھتیس گڑھ نے خواتین کی صحت، غذائیت اور بااختیاری کے میدان میں ایک اہم کامیابی حاصل کرتے ہوئے پردھان منتری ماترو وندنا یوجنا کے تحت فروری 2026 کی قومی درجہ بندی میں بڑی ریاستوں کے درمیان پہلا مقام حاصل کر لیا ہے۔ سرکاری اعداد و شمار کے مطابق ریاست میں اسکیم کے تحت 93.37 فیصد اندراج (انرولمنٹ)، 83.87 فیصد منظوری کی شرح اور 93.95 فیصد بروقت شکایات کے ازالے کی شرح درج کی گئی، جو اسکیم کے مؤثر نفاذ کی عکاسی کرتی ہے۔ اسی طرح 30 دن سے زیادہ زیر التوا معاملات کی شرح صرف 7.07 فیصد رہی جبکہ زیر التوا شکایات کی شرح 4.96 فیصد رہی، جو نگرانی کے مؤثر نظام اور شفاف خدمات کی فراہمی کو ظاہر کرتی ہے۔ قابل ذکر بات یہ ہے کہ ریاست نے پچھلے مہینے کے مقابلے چھ درجے بہتری حاصل کرتے ہوئے ملک میں پہلی پوزیشن حاصل کی۔
وزیراعلیٰ وشنودیوسائے کا ردعمل
ریاست کے وزیراعلیٰ وشنو دیو سائے نے خواتین و اطفال ترقیات محکمہ کے افسران، ملازمین اور آنگن واڑی کارکنان کو مبارکباد دیتے ہوئے کہا کہ ریاستی حکومت ماں اور بچے کی صحت کو اولین ترجیح دیتی ہے۔ انہوں نے کہا کہ پردھان منتری ماترو وندنا یوجنا، جس کے تحت حاملہ خواتین کو مالی مدد فراہم کی جاتی ہے، محفوظ زچگی کے فروغ میں اہم کردار ادا کرتی ہے۔ ان کے مطابق قومی سطح پر پہلی پوزیشن حاصل کرنا ریاست کے مسلسل عزم کا نتیجہ ہے۔
وزیر خواتین و اطفال ترقیات کا بیان
ریاست کی وزیر برائے خواتین و اطفال ترقیات لکشمی راجواڑے نے اس کامیابی کو ریاست کے لیے فخر کا لمحہ قرار دیتے ہوئے محکمہ کی ٹیم کو مبارکباد دی۔ انہوں نے کہا کہ وزیراعلیٰ وشنو دیو سائے کی رہنمائی میں چھتیس گڑھ خواتین کی فلاحی اسکیموں کے مؤثر نفاذ میں ملک کی نمایاں ریاستوں میں شامل ہو چکا ہے۔ اس کامیابی کا سہرا محکمہ کے افسران، عملے اور آنگن واڑی کارکنان کی مشترکہ کوششوں اور بروقت کام کو جاتا ہے۔
اسکیم سے فائدہ اٹھانے والی خواتین
وزیر کے مطابق مالی سال 2025–26 کے دوران اب تک ریاست میں 1,86,586 حاملہ خواتین نے اس اسکیم کے تحت رجسٹریشن کرایا ہے۔ اس کے علاوہ مستحق خواتین کے بینک کھاتوں میں 72 کروڑ 24 لاکھ 89 ہزار روپے کی رقم براہ راست منتقل کی جا چکی ہے۔ حکام کے مطابق اس اسکیم کے مؤثر نفاذ سے ریاست میں ماں اور بچے کی صحت کی خدمات مزید مضبوط ہوئی ہیں اور اب چھتیس گڑھ دیگر ریاستوں کے لیے ایک ماڈل کے طور پر ابھر رہا ہے۔
بھارت ایکسپریس اردو۔
ہندوستان کی مجموعی کامیابی میں پیرا ایتھلیٹکس کا سب سے بڑا کردار رہا۔ اس شعبے…
پیکٹ بند غذائی اشیا خریدتے وقت سب سے پہلے ان میں موجود شکر کی مقدار…
اپنے سفر کو یاد کرتے ہوئے رونالڈو نے اعتراف کیا کہ ان کے کیریئر میں…
منڈل پریشد علاقائی حلقوں (ایم پی ٹی سی) اور ضلع پریشد علاقائی حلقوں (زیڈ پی…
سماج وادی پارٹی کے سربراہ اکھلیش یادو اور پارٹی کو لے کر ان کے کارکن…
نئی دہلی: جماعت اسلامی ہند نے ایس آئی آر کی کارروائی کے بعد انتخابی فہرستوں…