West Asia conflict: مغربی ایشیا کی کشیدگی سے عالمی توانائی سپلائی متاثر، وزیراعظم نے کہا-’’ملک مقدم کے نظریے پر عمل کرے گی حکومت

تروچیراپلی (تمل ناڈو): وزیراعظم نریندر مودی نے کہا ہے کہ مغربی ایشیا میں جاری تنازع کے باعث پوری دنیا کی توانائی سپلائی چین متاثر ہوئی ہے، تاہم حکومت ہر حال میں ’’انڈیا فرسٹ‘‘ ملک مقدم کے اصول پر عمل کرے گی اور بھارتی شہریوں کے مفادات کو سب سے اوپر رکھے گی۔ بدھ کے روز تروچیراپلی میں ایک عوامی جلسے سے خطاب کرتے ہوئے انہوں نے کہا کہ موجودہ حالات میں گھبرانے یا افواہوں پر توجہ دینے کی ضرورت نہیں ہے۔ انہوں نے عوام سے اپیل کی کہ صرف درست اور مصدقہ معلومات ہی پھیلائیں۔

عالمی توانائی سپلائی پر اثر

وزیراعظم نے کہا کہ مغربی ایشیا میں جاری کشیدگی نے عالمی سطح پر توانائی کی سپلائی چین کو متاثر کیا ہے، لیکن حکومت ہر صورت میں بھارتی شہریوں کے مفادات کا تحفظ کرے گی۔ انہوں نے کہا کہ بھارت نے ماضی میں بھی مشکل حالات کا سامنا کیا ہے اور ملک ہر چیلنج سے کامیابی کے ساتھ نمٹنے کی صلاحیت رکھتا ہے۔ اپنے خطاب میں نریندر مودی نے کووڈ-19 وبا کے دوران بھارت کے کردار کا بھی ذکر کیا۔  انہوں نے کہا کہ اس مشکل وقت میں 100 کروڑ بھارتیوں نے دنیا کو دکھایا کہ ہمارا ملک کس قدر سنجیدہ اور ذمہ دار قوم ہے۔ وزیراعظم نے اس سے قبل ارناکولم میں خطاب کرتے ہوئے کہا کہ آج کا بھارت اپنے شہریوں کو مشکل وقت میں تنہا نہیں چھوڑتا۔ انہوں نے کہا کہ خلیجی ممالک میں کام کرنے والے لاکھوں بھارتیوں کی حفاظت کے لیے حکومت مسلسل کوشش کر رہی ہے اور بھارتی سفارت خانے چوبیس گھنٹے ان کی مدد کر رہے ہیں۔

کانگریس اور ڈی ایم کے پر تنقید

نریندر مودی نے کانگریس پارٹی پر الزام لگایا کہ وہ عالمی بحران کے وقت بھی سیاسی فائدہ اٹھانے کی کوشش کر رہی ہے اور اشتعال انگیز بیانات دے رہی ہے۔ اسی طرح انہوں نے ڈی ایم کے حکومت کو بھی تنقید کا نشانہ بناتے ہوئے کہا کہ تمل ناڈو میں ایک ’’سائنٹفک کرپشن ماڈل‘‘ چلایا جا رہا ہے اور ریاست کو ایک خاندان کے لیے اے ٹی ایم بنایا جا رہا ہے۔ واضح رہے کہ اس سے قبل وزیر اعظم نریندر مودی نے ترچیراپلی میں تقریباً 5650 کروڑ روپے کے متعدد ترقیاتی منصوبوں کا افتتاح اور سنگ بنیاد بھی رکھا تھا۔

بھارت ایکسپریس اردو۔