Centre Notifies Order To Strengthen Piped Natural Gas Infrastructure: قدرتی گیس انفراسٹرکچر کے فروغ اور پی این جی کی رسائی بہتر بنانے کے لیے مرکز کا نیا حکم جاری

نئی دہلی: مرکزی حکومت نے ملک بھر میں قدرتی گیس کے بنیادی ڈھانچے کو مضبوط بنانے اور کاروبار میں آسانی کو فروغ دینے کے مقصد سے ایک اہم حکم جاری کیا ہے۔ حکومت نے ضروری اشیاء ایکٹ 1955 کے تحت “نیچرل گیس اور پیٹرولیم مصنوعات کی تقسیم (پائپ لائن بچھانے، تعمیر، آپریشن اور توسیع سمیت دیگر سہولیات) آرڈر 2026” کو نافذ کر دیا ہے۔ یہ حکم فوری طور پر نافذ العمل ہو گیا ہے اور اس کے ذریعے ملک بھر میں قدرتی گیس کے نیٹ ورک کو تیزی سے وسعت دینے کا ہدف مقرر کیا گیا ہے۔ یہ حکم وزارت پیٹرولیم و قدرتی گیس کے ذریعے نافذ کیا گیا ہے، جس کا مقصد پائپ لائن بچھانے اور ان کی توسیع کے لیے ایک سادہ اور وقت بند فریم ورک فراہم کرنا ہے۔ حکام کے مطابق اس اقدام سے منظوری میں تاخیر، زمین تک رسائی میں مشکلات اور انتظامی رکاوٹوں کو کم کرنے میں مدد ملے گی، جس سے رہائشی علاقوں میں قدرتی گیس کا نیٹ ورک تیزی سے پھیل سکے گا۔ حکومت نے کہا کہ اس نئے حکم کے تحت گیس انفراسٹرکچر کی ترقی، موثر تقسیم اور صاف توانائی تک مساوی رسائی کے لیے ایک جامع، شفاف اور سرمایہ کار دوست ماحول تیار کیا جائے گا۔ اس کے ذریعے توانائی کے شعبے میں سرمایہ کاری کو فروغ ملنے کی بھی توقع ظاہر کی گئی ہے۔

پی این جی نیٹ ورک کی توسیع پر زور
اس حکم کا بنیادی مقصد پائپڈ نیچرل گیس یعنی پی این جی نیٹ ورک کی توسیع، آخری صارف تک رسائی بہتر بنانا اور گھریلو، صنعتی اور ٹرانسپورٹ کے شعبوں میں صاف ایندھن کے استعمال کو فروغ دینا ہے۔ حکومت کا کہنا ہے کہ اس اقدام سے ملک کی توانائی سلامتی مضبوط ہوگی اور گیس پر مبنی معیشت کی طرف منتقلی میں مدد ملے گی۔ سرکاری بیان میں کہا گیا ہے کہ یہ حکم انفراسٹرکچر کی ترقی میں حائل طویل عرصے سے موجود رکاوٹوں، ضابطہ جاتی غیر یقینی صورتحال اور منظوری میں تاخیر جیسے مسائل کو دور کرے گا۔ بیان کے مطابق اس اصلاحات کا بنیادی مقصد طریقہ کار کو آسان بنانا، ضابطہ جاتی رکاوٹوں کو کم کرنا اور تمام شراکت داروں کے لیے شفاف اور قابل پیش گوئی ماحول فراہم کرنا ہے۔

یکساں ضابطہ جاتی فریم ورک کی تشکیل
نئے حکم کے تحت پائپ لائن بچھانے، تعمیر، آپریشن اور توسیع کے لیے معیاری طریقہ کار اور وقت کی حد مقرر کی گئی ہے، جس سے انتظامی پیچیدگیوں میں کمی آئے گی۔ اس کے علاوہ، منظوری کے عمل کو تیز بنانے کے لیے “ڈیمنڈ اپروول” یعنی خودکار منظوری جیسے انتظامات بھی شامل کیے گئے ہیں، تاکہ غیر ضروری تاخیر کو ختم کیا جا سکے۔ حکومت نے مختلف ریاستوں اور علاقوں میں اجازت کے عمل کو یکساں بنانے پر بھی زور دیا ہے، جس سے اجازت ناموں میں بکھراؤ کم ہوگا اور شفافیت بڑھے گی۔ اس کے ساتھ ہی من مانی فیس اور اضافی چارجز کو ختم کرنے کا بھی اعلان کیا گیا ہے تاکہ لاگت میں پیش گوئی ممکن ہو سکے۔ حکام کے مطابق یہ قدم نہ صرف توانائی کے شعبے میں اصلاحات کو فروغ دے گا بلکہ سرمایہ کاری، جدت اور پائیدار ترقی کو بھی تقویت فراہم کرے گا۔ حکومت نے کہا کہ وہ قدرتی گیس کو صاف توانائی کے طور پر فروغ دینے اور ملک کی توانائی ضروریات کو پورا کرنے کے لیے پرعزم ہے۔

بھارت ایکسپریس اردو۔