Bomb threat on Varanasi-Bengaluru IndiGo flight: فلائٹ مؤخر کروانے کے مقصد سے غیرملکی مسافر نے کیا وارانسی-بنگلورو انڈیگو فلائٹ میں بم لے جانے کا جھوٹا دعویٰ، مسافروں میں پھیلا خوف و ہراس

پولیس نے اتوار کو بتایا کہ وارانسی ہوائی اڈے پر اس وقت خوف و ہراس پھیل گیا جب بنگلور جانے والی انڈیگو فلائٹ میں سوار ایک غیر ملکی شہری نے دعویٰ کیا کہ وہ بم لے کر جا رہا ہے۔ یہ واقعہ ہفتے کی رات پیش آیا تھا۔ پولیس نے مزید کہا کہ اس سلسلے میں ایک کینیڈین مسافر کو حراست میں لے لیا گیا ہے۔ حکام نے بتایا کہ سیکیورٹی اہلکار اس شخص سے پوچھ گچھ کر رہے ہیں۔

وارانسی میں گومتی زون کے ڈی سی پی آکاش پٹیل نے کہا ’’بم رکھنے کا دعویٰ کرنے والے مسافر نشانت کو، جو کینیڈا کا شہری ہے، پولیس کے حوالے کر دیا گیا ہے۔ تمام سیکیورٹی ایجنسیوں نے اس سے پوچھ گچھ کی اور یہ بات سامنے آئی کہ اس نے ہوائی اڈے کی کارروائیوں کو مؤخر کرنے کے لیے جھوٹا دعویٰ کیا تھا۔ مناسب دفعات کے تحت اس کے خلاف ایف آئی آر درج کی جا رہی ہے۔ کینیڈا ہائی کمیشن کو بھی اس سے آگاہ کیا جائے گا۔‘‘

پورے جہاز کا کیا گیا معائنہ

ہوائی اڈے کے ڈائریکٹر پُنیت گپتا نے بتایا کہ بم کی بات سنتے ہی مسافرین میں خوف و ہراس پھیل گیا اور حکام نے بھی پورے طیارے کو مکمل معائنہ کے لیے آئسولیشن بے میں منتقل کر دیا۔ تاہم جہاز پر کوئی بھی دھماکہ خیز مواد نہیں ملا۔انھوں نے کہا کہ ملزم کے دعوے کے بعد انڈیگو کے عملے نے فوری طور پر ایئر ٹریفک کنٹرول (اے ٹی سی) کو اس خطرے سے آگاہ کر دیا۔ جس کے بعد معیاری سیکیورٹی پروٹوکول کے مطابق پرواز کو روکا گیا اور اس کا معائنہ کیا گیا۔

حکام نے بتایا کہ سیکیورٹی ایجنسیوں سے کلیئرنس ملنے کے بعد، جہاز اتوار کی صبح بنگلورو کے لیے روانہ ہوا۔ انڈیگو نے اپنے بیان میں کہا کہ ’’26 اپریل کو وارانسی سے بنگلور جانے والی فلائٹ 6E 499، ٹیک آف سے پہلے بم کی دھمکی ملنے کی وجہ سے تاخیر کا شکار ہوئی۔ پروٹوکول کے مطابق ہوائی جہاز کو آئسولیشن بے میں لے جایا گیا، مسافروں کو بحفاظت جہاز سے اتارا گیا اور تمام معیاری آپریٹنگ طریقۂ کار کی پیروی کی گئی۔‘‘

بھارت ایکسپریس اردو