BJP Star Campaigners List: بنگال اسمبلی انتخابات کے لیے بی جے پی نے 40 اسٹار کیمپینر میدان میں اتارے، لسٹ جاری

مغربی بنگال اسمبلی انتخابات کے پیش نظر بھارتیہ جنتا پارٹی (بی جے پی) نے اپنے 40 اسٹار کیمپینر کی لسٹ جاری کر دی ہے، جس میں وزیر اعظم نریندر مودی، مرکزی وزیر داخلہ امت شاہ، وزیر دفاع راج ناتھ سنگھ اور اتر پردیش کے وزیر اعلیٰ یوگی آدتیہ ناتھ سمیت کئی بڑے لیڈر شامل ہیں۔ پارٹی نے انتخابات سے قبل اپنی پوری طاقت جھونکنے کا فیصلہ کیا ہے اور ریاست میں بھرپور انتخابی مہم چلانے کی تیاری مکمل کر لی ہے۔ پارٹی کے مطابق مغربی بنگال میں 23 اپریل اور 29 اپریل کو دو مرحلوں میں ووٹنگ ہوگی، جبکہ چار مئی کو نتائج کا اعلان کیا جائے گا۔ انتخابی تاریخوں کے اعلان کے بعد ریاست میں سیاسی سرگرمیاں تیز ہو گئی ہیں اور تمام بڑی جماعتیں ووٹروں کو لبھانے کی کوششوں میں مصروف ہیں۔ بی جے پی نے بھی اپنی انتخابی حکمت عملی کے تحت اسٹار کیمپینر کی فہرست جاری کرتے ہوئے مہم کو رفتار دے دی ہے۔

وزیر اعظم نریندر مودی نے اتوار کو کوچ بہار میں ایک بڑی عوامی ریلی سے انتخابی مہم کا آغاز کیا۔ اس دوران انہوں نے ریاست کی وزیر اعلیٰ ممتا بنرجی کی حکومت پر سخت تنقید کی اور دعویٰ کیا کہ اس بار مغربی بنگال میں تبدیلی یقینی ہے اور ریاست میں بی جے پی کی حکومت بنے گی۔ انہوں نے کہا کہ ریاست کی ترقی کے لیے ڈبل انجن حکومت ضروری ہے اور عوام اس بار تبدیلی کے حق میں ووٹ دیں گے۔

بی جے پی کی جانب سے جاری فہرست میں پارٹی کے کئی بڑے قومی اور علاقائی لیڈروں کو شامل کیا گیا ہے۔ ان میں مرکزی وزیر جے پی نڈا، مرکزی وزیر نتن گڈکری، دھرمیندر پردھان، آسام کے وزیر اعلیٰ ہیمنت بسوا سرما، مہاراشٹر کے سابق وزیر اعلیٰ دیویندر فڈنویس، اور مدھیہ پردیش کے سابق وزیر اعلیٰ شیوراج سنگھ چوہان کے نام بھی شامل ہیں۔ اس کے علاوہ فلمی دنیا اور کھیل کے میدان سے بھی کچھ معروف شخصیات کو فہرست میں جگہ دی گئی ہے۔ ان میں اداکار متھن چکرورتی، ٹینس اسٹار لینڈر پیس، اداکارہ ہیما مالنی اور کنگنا رناوت شامل ہیں، جو مختلف حلقوں میں انتخابی مہم کو تقویت دیں گے۔

دیگر لیڈروں میں اسمرتی ایرانی، انوراگ ٹھاکر، ارجن منڈا، منوج تیواری، بھپیندر یادو اور ریاستی سطح کے کئی لیڈر شامل ہیں، جو مختلف علاقوں میں جلسوں اور روڈ شوز کے ذریعے پارٹی امیدواروں کے حق میں ماحول بنانے کی کوشش کریں گے۔ سیاسی مبصرین کے مطابق بی جے پی کی جانب سے بڑے لیڈروں کو میدان میں اتارنے سے انتخابی مقابلہ مزید دلچسپ ہو گیا ہے۔ پارٹی کو امید ہے کہ اسٹار پرچارکوں کی مہم سے ووٹروں پر مثبت اثر پڑے گا اور مغربی بنگال میں اس کی پوزیشن مضبوط ہوگی۔ دوسری جانب حکمراں جماعت بھی اپنی انتخابی مہم تیز کرنے میں مصروف ہے، جس کے باعث ریاست میں سیاسی درجہ حرارت مسلسل بڑھ رہا ہے۔

بھارت ایکسپریس اردو۔