BJP MP changes Official Address Tuglak Lane renaming Vivekananda Marg: ناموں کی تبدیلی کی سیاست جاری، بی جے پی رکن پارلیمنٹ نے’تغلق لین‘ کا نام بدل کر’سوامی وویکانند مارگ‘ رکھ دیا

نئی دہلی: دہلی میں ناموں کی تبدیلی کی سیاست شدت اختیارکررہی ہے۔ بی جے پی کے کئی اراکین پارلیمنٹ نے اپنی سرکاری رہائش گاہوں کے نیم پلیٹ میں خود ہی ترمیم کرتے ہوئے تغلق لین کی جگہ سوامی وویکانند مارگ لکھوا لیا۔ اس فہرست میں فرید آباد کے رکن پارلیمنٹ کرشن پال گرجر، راجیہ سبھا کے رکن دنیش شرما اوروائس ایڈمرل کرن دیشمکھ شامل ہیں۔ حالانکہ، ان کی نام کی تختی پرابھی بھی چھوٹے حروف میں تغلق لین درج ہے اورنام کی تبدیلی کا یہ قدم سرکاری سطح پرنہیں بلکہ ذاتی طور پر اٹھایا گیا ہے۔

دہلی میں بی جے پی کی حکومت بننے کے بعد کئی اراکین اسمبلی نے اپنے اپنے علاقے کا نام بدلنے کا مطالبہ کیا تھا۔ نجف گڑھ کا نام بدل کر ناہرگڑھ، مصطفیٰ آباد کالونی کا نام بدل کرشیووہاراورجنوبی دہلی کے محمد پورگاؤں کا نام بدل کرمادھو پورم کرنے کا مطالبہ کیا گیا ہے۔ علاقوں کا نام بدلنے سے متعلق تنازعہ ابھی تھما بھی نہیں تھا۔ یوپی کے راجیہ سبھا رکن پارلیمنٹ اورسابق نائب وزیراعلیٰ دنیش شرما نے نئی دہلی میں اپنے سرکاری مکان کا پتہ خود تبدیل کردیا ہے۔

واضح رہے کہ دہلی اسمبلی میں بی جے پی اراکین اسمبلی کے ذریعہ دارالحکومت دہلی کے کئی علاقوں میں نام تبدیل کرنے کے مطالبہ کے بعد بی جے پی رکن پارلیمنٹ دنیش شرما کے ذریعہ یہ قدم اٹھایا گیا ہے۔ یہ قدم سیاسی طور پرکافی اہم مانا جا رہا ہے۔ تغلق لین کا نام تبدیل کر کے سوامی وویکا نند مارگ کرکے یہ پیغام دیا کہ وہ تغلق لین نام کوبدلنا چاہتے ہیں۔