Tejashwi Yadav on BJP: ’’بنگال میں غنڈہ گردی کر رہی ہے بھارتیہ جنتا پارٹی…‘‘، کولکتہ عصمت دری معاملے پر تیجسوی یادو کا بی جے پی پر حملہ

پٹنہ: آر جے ڈی لیڈر تیجسوی یادو نے کہا ہے کہ بی جے پی بنگال میں غنڈہ گردی کر رہی ہے اور امن کو خراب کرنے کی کوشش کر رہی ہے۔ انہوں نے الزام لگایا کہ بی جے پی لوگوں کو بھڑکا رہی ہے اور پورے ملک کا ماحول خراب کرنے کی کوشش کر رہی ہے۔ تیجسوی یادو نے اتر پردیش اور بہار میں عصمت دری کے بڑھتے ہوئے واقعات پر بھی سوال اٹھائے۔ انہوں نے کہا کہ عصمت دری کے سب سے زیادہ واقعات اتر پردیش میں ہو رہے ہیں اور ایسے ہی واقعات بہار میں بھی لگاتار ہو رہے ہیں، لیکن اس پر خاموشی اختیار کی جا رہی ہے۔ تیجسوی نے کہا کہ بی جے پی پورے ملک میں دہشت پھیلانے کی کوشش کر رہی ہے۔

بہار کے ڈی جی پی آر ایس بھٹی کے سی آئی ایس ایف کے ڈی جی بننے کے معاملے پر تیجسوی یادو نے کہا کہ بہار میں کوئی بھی اچھا افسر کام نہیں کرنا چاہتا کیونکہ یہاں حالات بہت خراب ہیں۔ تیجسوی نے کہا کہ ریاستی ڈی جی پی کا عہدہ سی آئی ایس ایف کے ڈی جی پی سے کئی گنا زیادہ طاقتور ہوتا ہے اور اچھے افسران ہمیشہ ریاست کے ڈی جی پی بننے کو ترجیح دیتے ہیں۔ انہوں نے الزام لگایا کہ نتیش کمار کے دور حکومت میں ٹرانسفر اور پوسٹنگ کا عمل مکمل طور پر نیلامی پر مبنی ہے اور اس کی وجہ سے اچھے افسران بہار میں کام نہیں کرنا چاہتے۔

جے پی نڈا کے بہار دورے پر تیجسوی نے کہا کہ انہیں بہار آنا چاہئے، کیونکہ بہار ہمیشہ بی جے پی کے لئے چیلنج رہا ہے۔ تیجسوی نے یہ بھی کہا کہ لوک سبھا انتخابات میں بی جے پی اپنی کوششوں میں کامیاب نہیں ہو سکی۔ انہوں نے بی جے پی کو ’پچھ لگو‘ قرار دیتے ہوئے کہا کہ اس کی حالت اب بہتر ہونے والی نہیں ہے۔

بھارت ایکسپریس۔