Bihar First Phase Of Polling On Thursday : بہار میں پہلے مرحلے کی ووٹنگ جمعرات کو، سمراٹ، تیجسوی اور وجے سمیت کئی قدآور رہنماؤں کے مستقبل کا ہوگا فیصلہ

بہار اسمبلی انتخابات کے پہلے مرحلے کی ووٹنگ جمعرات کو ہوگی، جس میں ریاست کے 121 اسمبلی حلقوں کے ووٹر 1314 امیدواروں کی قسمت کا فیصلہ کریں گے۔ اس مرحلے میں 3 کروڑ 75 لاکھ سے زائد ووٹر اپنے حق رائے دہی کا استعمال کریں گے، جبکہ کئی بڑے سیاسی چہروں کی ساکھ بھی داؤ پر لگی ہے۔ پہلے مرحلے میں جہاں این ڈی اے کے 121 امیدوار میدان میں ہیں، وہیں مہاگٹھ بندھن (اپوزیشن اتحاد) کے 126 امیدوار اپنی قسمت آزما رہے ہیں۔ این ڈی اے کی جانب سے بی جے پی کے 48، جے ڈی یو کے 57، لوک جن شکتی پارٹی (رام ولاس) کے 14 اور راشٹریہ لوک مورچہ کے دو امیدوار میدان میں ہیں۔

دوسری طرف مہاگٹھ بندھن کے خیمے سے آر جے ڈی کے 73، کانگریس کے 24، بائیں بازو جماعتوں (بھاکپا مالے) کے 14، سی پی ایم کے تین، بھاکپا کے پانچ، وی آئی پی کے پانچ اور انڈین انقلاب پارٹی کے تین امیدوار انتخابی دنگل میں ہیں۔ سیاسی ماہرین کے مطابق، پہلے مرحلے کی ووٹنگ کئی بڑے رہنماؤں کے لیے فیصلہ کن ثابت ہو سکتی ہے۔ نائب وزرائے اعلیٰ سمراٹ چودھری اور وجے سنہا کے ساتھ ساتھ آر جے ڈی لیڈر تیجسوی یادو کے مستقبل کا فیصلہ بھی جمعرات کو ووٹرز کریں گے۔ اس مرحلے میں 14 وزراء بھی اپنی قسمت آزما رہے ہیں۔

پہلے مرحلے کے تحت مدھےپورہ، سہرسہ، دربھنگہ، مظفرپور، گوپال گنج، سیوان، سارن، ویشالی، سمستی پور، بیگوسرائے، کھگڑیا، مونگیر، لکھی سرائے، شیخ پورہ، نالندہ، پٹنہ اور بھوج پور اضلاع میں ووٹنگ ہوگی۔ اس مرحلے میں کئی پارٹیوں کے ریاستی صدور بھی میدان میں ہیں۔ جے ڈی یو کے ریاستی صدر امیش سنگھ کشواہا مہنار سے انتخاب لڑ رہے ہیں، راشٹریہ لوک مورچہ کے سربراہ مدن چودھری پارو سے جبکہ آئی آئی پی کے صدر اندرجیت پرساد گپتا سہرسہ سے قسمت آزما رہے ہیں۔

انتخابی دنگل میں کئی معروف اور غیر روایتی چہرے بھی شامل ہیں، جن میں لوک گیت کی گلوکارہ میتھلی ٹھاکر، اداکار و گلوکار کھیساری لال یادو، سابق آئی پی ایس آفیسر آنند مشرا، سابق ایم پی شہاب الدین کے بیٹے اسامہ شہاب اور سابق وزیراعلیٰ کی پوتی کرشمہ رائے شامل ہیں۔ پہلے مرحلے کے انتخابات میں اصل مقابلہ وزیراعلیٰ نتیش کمار کی قیادت والے این ڈی اے اور تیجسوی یادو کی قیادت والے مہاگٹھ بندھن کے درمیان مانا جا رہا ہے۔ تاہم کچھ حلقوں میں جن سوراج پارٹی اور اے آئی ایم آئی ایم کے امیدوار بھی مضبوط مقابلہ پیش کر رہے ہیں۔

بھارت ایکسپریس اردو