West Bengal, Birbhum Hotel Fire: بنگال کے بیربھوم ہوٹل میں خوفناک آگ سے 5 افراد جھلس کر ہلاک، کئی زخمی

نئی دہلی :مغربی بنگال کے بیربھوم ضلع میں پیر کی صبح ایک بڑا اور دل دہلا دینے والا حادثہ پیش آیا۔ تاراپیٹھ مندر کے قریب واقع ایک چار منزلہ ہوٹل میں علی الصبح اچانک زبردست آگ بھڑک اٹھی۔ اس حادثے میں کم از کم 5 افراد کے جھلس کر ہلاک ہونے کی اطلاع ہے، جبکہ 5 دیگر افراد کے زخمی ہونے کی بات سامنے آئی ہے۔ آگ لگنے کی ابتدائی وجہ شارٹ سرکٹ بتائی جا رہی ہے، تاہم حتمی وجہ کی تصدیق تحقیقات مکمل ہونے کے بعد ہی ہو سکے گی۔پولیس کے مطابق آگ صبح تقریباً 5 بجے تاراپیٹھ مندر نگری میں واقع چار منزلہ ہوٹل کی نچلی منزل پر لگی۔ جس وقت یہ حادثہ پیش آیا، ہوٹل میں موجود زیادہ تر مہمان گہری نیند میں تھے۔ اچانک دھواں اور آگ پھیلنے سے ہوٹل میں قیام کرنے والے لوگوں میں خوف و ہراس پھیل گیا اور لوگ اپنی جان بچانے کے لیے باہر نکلنے کی کوشش کرنے لگے۔اطلاع ملتے ہی فائر بریگیڈ کی متعدد گاڑیاں موقع پر پہنچ گئیں۔

فائر فائٹرز نے کافی کوششوں کے بعد آگ پر قابو پالیا۔ تاہم، اس وقت تک آگ عمارت کے کئی حصوں کو اپنی لپیٹ میں لے چکی تھی۔ امدادی ٹیموں نے ہوٹل کے اندر پھنسے افراد کو باہر نکالنے کی کوشش کی اور زخمیوں کو فوری طور پر اسپتال منتقل کیا۔تمام زخمیوں کو رام پورہاٹ گورنمنٹ میڈیکل کالج اینڈ اسپتال لے جایا گیا، جہاں ان کا علاج جاری ہے۔ اسپتال ذرائع نے ابتدائی طور پر 5 افراد کی موت کی تصدیق کی۔ حکام کے مطابق متعدد افراد کو علاج کے لیے اسپتال میں داخل کرایا گیا ہے، جن میں کچھ کی حالت تشویشناک بھی بتائی جا رہی ہے۔جس ہوٹل میں آگ لگی، اس کا نام ’’بدیشنی‘‘ بتایا گیا ہے۔ یہ ہوٹل تاراپیٹھ مندر کے بالکل قریب واقع ہے، جس کی وجہ سے یہاں عقیدت مندوں کی بڑی تعداد قیام کرتی ہے۔ بتایا جا رہا ہے کہ جن افراد کی موت ہوئی، وہ بھی مندر میں درشن کے لیے تاراپیٹھ پہنچے تھے۔ یہ لوگ رات میں ہوٹل آئے تھے اور آرام کرنے کے لیے اپنے کمروں میں ٹھہرے ہوئے تھے۔ انہیں پیر کے روز مندر میں درشن کے لیے جانا تھا، لیکن اس سے پہلے ہی یہ المناک حادثہ پیش آگیا۔ابتدائی معلومات کے مطابق آگ ہوٹل کے گراؤنڈ فلور سے شروع ہوئی اور کچھ ہی دیر میں تیزی سے اوپری منزلوں تک پھیل گئی۔

ہوٹل انتظامیہ نے خدشہ ظاہر کیا ہے کہ آگ شارٹ سرکٹ کی وجہ سے لگی، تاہم پولیس اور متعلقہ ادارے اس پہلو سمیت دیگر ممکنہ وجوہات کی بھی جانچ کر رہے ہیں۔بیربھوم کے ایڈیشنل سپرنٹنڈنٹ آف پولیس نیلیش شری کانت گائیکر نے صحافیوں سے گفتگو میں کہا کہ امدادی کارروائیاں ابھی جاری ہیں۔ انہوں نے بتایا کہ تمام متاثرہ افراد کو رام پورہاٹ اسپتال بھیجا گیا ہے اور اب تک تقریباً 11 سے 12 افراد کو اسپتال میں داخل کرایا گیا ہے۔ پولیس کا کہنا ہے کہ تحقیقات کے بعد ہی حادثے کی مکمل تفصیلات سامنے آ سکیں گی۔اس واقعے کے بعد تاراپیٹھ میں غم کی فضا ہے۔ پولیس اور انتظامیہ ہوٹل میں حفاظتی انتظامات، آگ لگنے کی اصل وجہ اور فائر سیفٹی کے اقدامات کی بھی جانچ کر رہی ہے۔

بھارت ایکسپریس اردو