Tariq Anwar taunts PM Modi: آئین کا حصہ ہے آرٹیکل 370، پی ایم مودی کو تاریخ کا علم نہیں، وزیراعظم پر کانگریس ایم پی طارق انور کا طنز

نئی دہلی: کانگریس کے رکن پارلیمنٹ طارق انور نے جمعرات کے روز آئی اے این ایس سے خصوصی بات چیت کی۔ اس دوران انہوں نے آرٹیکل 370 سمیت کئی مدعے پر اپنی رائے کا اظہار کیا۔ طارق انور نے کہا کہ آرٹیکل 370 آئین کا حصہ ہے اور اسے ایک خاص صورتحال میں نافذ کیا گیا تھا۔ سب جانتے ہیں کہ کشمیر میں مسلمانوں کی تعداد زیادہ ہے۔ اس وقت شیخ عبداللہ صاحب وہاں موجود تھے اور انہوں نے فیصلہ کیا کہ ہم ہندوستان کے ساتھ رہیں گے، تو اس وقت راجہ ہری سنگھ کے ساتھ ایک معاہدہ ہوا تھا، جس میں یہ طے ہوا تھا کہ اس علاقے میں دفعہ 370 نافذ رہے گی۔ اسے ہندوستان کے ساتھ جڑنے کے لیے اس وقت کے حالات کو مدنظر رکھتے ہوئے لاگو کیا گیا تھا، لیکن وزیر اعظم کو تاریخ کا کوئی علم نہیں ہے۔

انہوں نے مزید کہا، ’’ جب کوئی الیکشن آتا ہے، وہ تبھی ایسی باتیں کہتے ہیں۔ ابھی جب چار ریاستوں میں انتخابات ہونے تھے تو دو بار میں دو دو ریاستوں میں انتخابات کر وائے۔ وہ جموں و کشمیر، جھارکھنڈ، ہریانہ اور مہاراشٹر میں ایک ساتھ انتخابات کروا سکتے تھے، لیکن ان کی نیت ٹھیک نہیں ہے۔ ’ون نیشن ون الیکشن محض ایک نعرہ ہے اور یہ آئین کی شقوں کے خلاف ہے، کیونکہ ہمارا ملک وفاقی ڈھانچے میں بندھا ہوا ہے اور ہر ریاست کی سیاسی صورتحال مختلف ہے۔ اسی کو ذہن میں رکھتے ہوئے بابا صاحب امبیڈکر نے آئین بنایا۔

دہلی میں آلودگی کی صورتحال پر طارق انور نے کہا کہ ہم بڑے بڑے دعوے کرتے ہیں، وشو گرو بننے کی بات کرتے ہیں، لیکن ہم ملک کے دارالحکومت کو آلودگی سے پاک نہیں کر سکے۔ حقیقت یہ ہے کہ ہندوستان اب بھی بہت پسماندہ ہے۔ آج ہندوستان کی مختلف ریاستوں میں سب سے زیادہ آلودگی ہے۔ ہمیں اس صورتحال کو بدلنے کی کوشش کرنی چاہئے۔ بڑی بڑی باتوں اور دعوؤں سے ملک نہیں بدل سکتا ہے۔

کانگریس لیڈر نے دہلی میں لیفٹیننٹ گورنر اور عام آدمی پارٹی کے درمیان جاری تنازع پر ردعمل ظاہر کیا۔ انہوں نے کہا کہ کیجریوال اور عام آدمی پارٹی کی طرف سے ایک وضاحت آئی ہے کہ ہماری آیوشمان یوجنا کو لاگو کرنے کی ضرورت نہیں ہے، کیونکہ ہم پہلے ہی وہ سہولت فراہم کر رہے ہیں اور اس میں نہ تو فنڈ کی کوئی حد ہے اور نہ ہی عمر کی پابندی ہے۔ یہ دہلی حکومت کی طرف سے شروع کیا گیا ایک اچھا پروگرام ہے اور اسے پورے ملک میں لاگو کیا جانا چاہئے۔

بھارت ایکسپریس۔