Armed forces flag day: مسلح افواج کے فنڈ میں حصہ ڈال کر جوانوں کی خدمات کا اعتراف کریں: وزیر اعظم مودی

وزیر اعظم نریندر مودی نے آج مسلح افواج جھنڈا دیوس کے موقع پر مسلح افواج کے تئیں شکریہ ادا کیا اور قوم کے لیے ان کی وابستگی کی ستائش کی۔سوشل میڈیا پلیٹ فارم ’ایکس‘ پر پوسٹ کرتے ہوئے وزیر اعظم نے کہا: ’’مسلح افواج جھنڈا دیوس پر، ہم ان بہادر مردوں اور خواتین کے تئیں اپنی گہری قدردانی ظاہر کرتے ہیں جو غیر متزلزل حوصلے کے ساتھ ہمارے ملک کی حفاظت کرتے ہیں۔ ان کی تربیت، پختہ عزم اور جذبہ ہمارے لوگوں کی حفاظت کرتا ہے اور ہمارے ملک کو مضبوط بناتا ہے۔ ان کی وابستگی ہمارے ملک کے لیے فرض، نظم و ضبط اور قربانی کی ایک طاقتور مثال ہے۔ آئیں، ہم بھی مسلح افواج جھنڈا دیوس فنڈ میں تعاون کریں۔‘‘

نائب صدر جمہوریہ  سی پی رادھا کرشن نے بھی عطیہ دیا

مسلح افواج جھنڈا دیوس کے موقع پر، دفاعی وزارت کی ایک نمائندہ ٹیم نے نائب صدر جمہوریہ  سی پی رادھا کرشن کو مسلح افواج جھنڈا دیوس کا لیپل پن لگایا۔ اس کی قیادت سابقہ فوجی فلاح و بہبود شعبہ کی سکریٹری سُکرتی لِکھی نے کی۔ نائب صدر جمہوریہ  سی پی رادھا کرشن نے اپنی پورے ایک ماہ کی تنخواہ مسلح افواج جھنڈا دیوس فنڈ میں عطیہ کی۔ نائب صدر جمہوریہ  سی پی رادھا کرشن نے عوام سے اپیل کرتے ہوئے سوشل میڈیا پلیٹ فارم ’ایکس‘ پر لکھا: ’’میں تمام شہریوں سے بھی اپیل کرتا ہوں کہ وہ خود رضاکارانہ طور پر مسلح افواج جھنڈا دیوس فنڈ میں تعاون کریں اور ہمارے شہداء، معذور فوجیوں اور ان کے اہل خانہ کے تئیں اپنی قدردانی کا اظہار کریں۔‘‘

لیفٹننٹ گورنر منوج سِنہا کی اپیل

جموں و کشمیر کے لیفٹننٹ گورنر منوج سنہا نے آفیشل سوشل میڈیا پلیٹ فارم ’ایکس‘ پر لکھا: ’’مسلح افواج جھنڈا دیوس پر، میں ہمارے بہادر فوجیوں اور شہداء کا دل سے شکریہ ادا کرتا ہوں جو ملک کے لیے اپنی اعلیٰ ترین قربانی اور خدمات انجام دیتے ہیں۔ آئیں، ہم اپنے بہادر سپاہیوں اور ان کے اہل خانہ کی بھلائی اور عزت کو یقینی بنانے کے لیے مسلح افواج جھنڈا دیوس فنڈ میں دل کھول کر عطیہ کریں۔‘‘

چیف آف ڈیفنس اسٹاف کی مبارکباد

چیف آف ڈیفنس اسٹاف جنرل انل چوہان نے بھی تمام بھارتی مسلح افواج کے فوجیوں، سابق فوجیوں اور بہادر خواتین کو نیک تمنائیں دی اور بھارت کی دفاعی تیاریوں اور قومی سلامتی میں ان کی لگن، حوصلہ اور پائیدار خدمات کو سراہا۔

مرکزی وزیر دفاع کی اپیل

مرکزی دفاعی وزیر مملکت سنجے سیٹھ نے سوشل میڈیا پر بھارتی مسلح افواج کی تعریف کی اور عوام سے مسلح افواج جھنڈا دیوس فنڈ میں تعاون کرنے کی اپیل کی۔

نوٹ: یہ خبر ایجنسی (IANS) فیڈ سے براہِ راست شائع کی گئی ہے اور اس میں کسی بھی معلومات میں کوئی تبدیلی نہیں کی گئی۔ خبر کو پڑھنے کے قابل بنانے کے لیے صرف ہیڈ لائن بدلی گئی ہے اور پیرگراف سے پہلے سب ہیڈ شامل کیے گئے ہیں۔ بھارت ایکسپریس اس اسٹوری کے لیے کسی بھی اخلاقی ذمہ داری کا اہل نہیں ہوگا۔

بھارت ایکسپریس اردو۔