11 Years of Modi Government: ارجن رام میگھوال اور سنجے نشاد نے مودی حکومت کے گیارہ سال کی کامیابیوں پر ڈالی روشنی، کہا – پی ایم مودی کی قیادت میں ہم ’وشو گرو‘ بننے کی طرف گامزن

مرکزی وزیر ارجن رام میگھوال اور اتر پردیش حکومت کے وزیر سنجے نشاد نے وزیر اعظم نریندر مودی کے 11 سالہ دور حکومت کی جم کر تعریف کی ہے۔ دونوں سیاسی لیڈران نے کہا کہ ان 11 سالوں میں ملک نے ہر میدان میں بے مثال ترقی کی ہے اور پی ایم مودی کی قیادت میں ہندوستان ’وشو گرو‘ یعنی عالمی لیڈر بننے کی راہ پر گامزن ہے۔

ارجن رام میگھوال نے کہا کہ ’’9 جون 2024 کو نریندر مودی نے تیسری بار وزیر اعظم کے طور پر حلف لیا۔ کچھ لوگوں کا خیال تھا کہ مخلوط حکومت بننے سے فیصلے لینے میں مشکل ہو جائے گی، لیکن پی ایم مودی نے اسے غلط ثابت کیا۔ آپریشن سندور جیسے بڑے فیصلے لیے گئے، جی ایس ٹی کی وصولی میں اضافہ ہوا اور کوئی انفراسٹرکچر کا کام نہیں رکا۔ ​​یہ پی ایم مودی کی مضبوط قیادت کا نتیجہ ہے۔‘‘ میگھوال نے مزید کہا کہ ان 11 سالوں میں سڑک، ریل، ہوائی اڈے اور دیگر بنیادی ڈھانچے کی ترقی میں تیزی آئی، جس نے ملک کی تصویر بدل دی ہے۔

صحیح پالیسیوں سے مودی حکومت نے بدلی ملک کی تصویر: سنجے نشاد

دریں اثنا سنجے نشاد نے مودی حکومت کی کامیابیوں کو اجاگر کرتے ہوئے کہا کہ ’’11 سال بے مثال گزرے ہیں۔ کئی بڑے فیصلے لیے گئے۔ اس میں جموں و کشمیر سے آرٹیکل 370 کو ہٹانا، رام مندر کی تعمیر اور انگریزوں کے بنائے ہوئے پرانے قوانین کو ختم کرنا شامل ہے۔‘‘ انھوں نے کہا کہ پی ایم مودی نے درست پالیسیاں بنا کر ملک کو آگے بڑھایا ہے۔

سنجے نشاد نے مزید کہا ’’پہلے اناج گوداموں میں سڑ جاتا تھا اور لوگ بھوک سے مر جاتے تھے، لیکن پی ایم مودی نے غریبوں کو مفت اناج پہنچایا۔ پہلے لوگ پیسے کی کمی کی وجہ سے علاج نہیں کروا پاتے تھے، لیکن آیوشمان بھارت اسکیم سے غریبوں کو مفت اور بہتر طبی سہولیات ملیں‘‘۔ ماہی گیروں اور کسانوں کے لیے کیے گئے کام کا ذکر کرتے ہوئے وزیر سنجے نشاد نے کہا کہ ’’گزشتہ 67 سالوں میں ماہی گیروں کو صرف 3 ہزار کروڑ روپے ملے تھے، لیکن پی ایم مودی کے دور میں 41،500 کروڑ روپے دیے گئے۔ کسانوں کو بھی ہر طرح کی سہولتیں دی جا رہی ہیں۔‘‘

بھارت ایکسپریس اردو