Land Port Management System: وزیرداخلہ امت شاہ نے لینڈ پورٹ مینجمنٹ سسٹم ’’ونیمئے‘‘ کا کیا افتتاح، تجارت اور سرحدی سلامتی میں اہم کردار پر زور

نئی دہلی: مرکزی وزیر داخلہ امت شاہ نے منگل کے روز لینڈ پورٹ مینجمنٹ سسٹم (LPMS) ’’ونیمئے‘‘ کا افتتاح کیا۔ یہ ایک جدید اور تصدیق شدہ ڈیجیٹل پلیٹ فارم ہے، جس کا مقصد ہندوستان کے زمینی سرحدی بندرگاہوں (لینڈ پورٹس) پر کام کاج کو جدید، مربوط اور مؤثر بنانا ہے۔ یہ نظام کسٹمز، امیگریشن حکام، سرحدی حفاظتی دستوں اور دیگر متعلقہ اداروں کے درمیان بہتر تال میل اور معلومات کے فوری تبادلے کو ممکن بنائے گا۔ افتتاحی تقریب سے خطاب کرتے ہوئے امت شاہ نے کہا کہ وزیراعظم نریندر مودی کے وژن نے لینڈ پورٹس کو نئی شناخت دی ہے۔ ان کے مطابق یہ بندرگاہیں نہ صرف سرحدی سلامتی کی پہلی دفاعی دیوار بن چکی ہیں بلکہ تجارت کو زیادہ محفوظ، آسان اور تیز رفتار بنانے میں بھی اہم کردار ادا کر رہی ہیں۔ انہوں نے کہا: ’’لینڈ پورٹس اتھارٹی کا تصور بنیادی طور پر سکیورٹی خدشات کے پیش نظر سامنے آیا تھا، لیکن وزیر اعظم نریندر مودی کے وژن نے اسے صرف سلامتی کا مضبوط حصار ہی نہیں بنایا بلکہ تجارت کو بھی زیادہ محفوظ اور سہل بنایا ہے۔ اس تصور میں ایک نئی جہت یہ بھی شامل کی گئی ہے کہ لینڈ پورٹس دو ممالک کے عوام کے درمیان رابطے کا مؤثر ذریعہ بن سکتے ہیں۔‘‘

غیر قانونی تجارت اور دراندازی کی روک تھام میں اہم کردار

امیت شاہ نے کہا کہ لینڈ پورٹس کی تیز رفتار ترقی سے نہ صرف تجارت میں اضافہ ہوا ہے بلکہ سرحدی سلامتی کو بھی مضبوطی ملی ہے۔ انہوں نے کہا کہ ان بندرگاہوں نے غیر قانونی تجارت کو قانونی تجارتی سرگرمیوں میں تبدیل کرنے اور غیر قانونی ہجرت جیسے مسائل پر قابو پانے میں بھی نمایاں کردار ادا کیا ہے۔ انہوں نے کہا: ’’تفصیلی جائزے کے بعد میں یہ کہہ سکتا ہوں کہ لینڈ پورٹس کی ترقی سے تجارت اور سلامتی دونوں کو فائدہ پہنچا ہے۔ اس کے ساتھ ہی سرحدی علاقوں میں غیر قانونی ہجرت جیسے مسائل کے حل میں بھی ان کا اہم کردار رہا ہے۔‘‘ وزارت داخلہ کے مطابق LPMS کا آغاز ہندوستان کے جدید، ٹیکنالوجی سے لیس اور اسمارٹ سرحدی انتظامی نظام کی جانب ایک اہم سنگ میل ثابت ہوگا۔ یہ پلیٹ فارم تجارت، رابطے، قومی سلامتی اور ’’وکست بھارت 2047‘‘ کے ہدف کو تقویت دینے میں مددگار ہوگا۔ یہ جدید ڈیجیٹل نظام تمام لینڈ پورٹس کی سرگرمیوں کو ایک مشترکہ پلیٹ فارم پر لائے گا اور لاجسٹکس و ضابطہ جاتی معلومات کے محفوظ اور حقیقی وقت میں تبادلے کو یقینی بنائے گا۔ اس کے ذریعے لینڈ پورٹس کو ہوائی اڈوں اور سمندری بندرگاہوں میں رائج جدید ڈیجیٹل نظاموں کے مساوی بنایا جائے گا۔

کارگو اور مسافروں کے لیے مکمل ڈیجیٹل سہولت

نئے نظام میں کارگو اور مسافروں کی نقل و حرکت سے متعلق تمام مراحل کو ڈیجیٹل بنایا گیا ہے، جن میں سلاٹ بکنگ، آن لائن ادائیگی، ٹریکنگ، سنگل ونڈو کلیئرنس شامل ہیں۔ یہ پلیٹ فارم ICEGATE، ULIP اور موٹر وہیکل ایکو سسٹم جیسے قومی ڈیجیٹل پلیٹ فارمز کے ساتھ بھی مربوط ہوگا، جس سے سرحدی انتظام مزید شفاف، تیز اور مؤثر بن سکے گا۔ لینڈ پورٹس اتھارٹی آف انڈیا (LPAI)، جو وزارت داخلہ کے محکمہ بارڈر مینجمنٹ کے تحت ایک قانونی ادارہ ہے، اس وقت ملک کی بین الاقوامی سرحدوں پر قائم 15 لینڈ پورٹس کا انتظام سنبھال رہی ہے۔ ان میں پنجاب کے اٹاری اور ڈیرہ بابا نانک، بہار کے راکسول اور جوگبانی، اتر پردیش کا روپئی ڈیہا، آسام کے درنگا، سُتارکنڈی، گولک گنج اور منکاچر، مغربی بنگال کا پیٹراپول، میگھالیہ کا ڈاؤکی، تریپورہ کے اگرتلہ، سری منت پور اور سبروم، جبکہ منی پور کا مورے لینڈ پورٹ شامل ہیں۔ حکومت کا کہنا ہے کہ ’’ونیمئے‘‘ نظام سرحدی تجارت، علاقائی تعاون اور قومی سلامتی کو نئی مضبوطی فراہم کرے گا۔

بھارت ایکسپریس اردو۔