Amit shah Inaugurations: امت شاہ نے گجرات میں موتی بھائی آر۔ چودھری سَینک اسکول اور ساگر آرگینک پلانٹ کا کیا افتتاح، کسانوں اور خواتین کو ہوگا فائدہ

مرکزی وزیرِ داخلہ و تعاون امت شاہ نے آج ویڈیو کانفرنسنگ کے ذریعے گجرات میں موتی بھائی آر۔ چودھری ساگر سَینک اسکول اور ساگر آرگینک پلانٹ کا افتتاح کیا۔ اس موقع پر گجرات کے وزیراعلیٰ بھوپندر پٹیل سمیت کئی معزز شخصیات موجود تھیں۔ امت شاہ نے دہلی میں حال ہی میں ہوئے کار دھماکے میں جاں بحق افراد کے اہلِ خانہ کے تئیں تعزیت کا اظہار کرتے ہوئے کہا کہ وزیراعظم نریندر مودی کا اس واردات میں ملوث مجرموں کو سخت ترین سزا دلانے کا عزم ضرور پورا ہوگا۔ انہوں نے کہا کہ یہ سزا مستقبل میں ملک میں کسی بھی دہشت گرد حملے کی نیت رکھنے والوں کے لیے ایک واضح انتباہ ثابت ہوگی۔ وزیر داخلہ نے دہشت گردی کے خلاف بھارت کی لڑائی میں وزیراعظم مودی کی قیادت کی تعریف کرتے ہوئے کہا کہ گزشتہ 11 برسوں میں بھارت نے عالمی سطح پر اپنی مؤثر موجودگی ثابت کی ہے۔ انہوں نے واضح کیا کہ دہلی دھماکے کے مجرموں کو سخت سزا دلانے کے لیے حکومت پوری طرح پابندِ عہد ہے۔

موتی بھائی چودھری کی خدمات کو خراجِ تحسین

شاہ نے موتی بھائی چودھری کی سماجی خدمات اور مثالی زندگی کی ستائش کرتے ہوئے کہا کہ ان کے کارناموں نے گجرات کے کسانوں، مویشی پالوں اور دیہی علاقوں کو خوشحالی کی سمت میں آگے بڑھایا۔ انہوں نے کہا کہ ’امول‘ آج دنیا میں تعاون (کوآپریٹیو) کا ایک بڑا برانڈ ہے، جس کی بنیاد انہی جیسی عظیم شخصیات نے رکھی تھی۔ موتی بھائی چودھری سَینک اسکول 11 ایکڑ رقبے میں پھیلا ہوا ہے اور اس پر 50 کروڑ روپے کی لاگت آئی ہے۔ اسکول میں اسمارٹ کلاس روم، ہاسٹل، لائبریری اور کینٹین جیسی جدید سہولیات موجود ہیں۔ امت شاہ نے کہا کہ اس اسکول کے ذریعے گجرات کے بچوں کو بھارتی مسلح افواج میں خدمات کا راستہ ملے گا۔ انہوں نے بتایا کہ حکومت پی پی پی (PPP) ماڈل کے تحت ملک بھر میں 100 نئے سَینک اسکول قائم کرنے کا فیصلہ کر چکی ہے، اور موتی بھائی چودھری اسکول مہسانہ کے لیے فخر کا باعث بنے گا۔

گجرات کی شناخت کو عالمی سطح پر تقویت

ساگر آرگینک پلانٹ کے افتتاح کے موقع پر شاہ نے کہا کہ یہ پلانٹ ’امول‘ برانڈ کے تحت قابلِ اعتماد آرگینک مصنوعات کو ملک اور بیرونِ ملک پہنچانے میں اہم کردار ادا کرے گا۔ 30 میٹرک ٹن روزانہ کی صلاحیت والا یہ پلانٹ NPOP اور APEDA سے تصدیق شدہ ہے، جو شمالی گجرات کے کسانوں کی پیداوار کو عالمی منڈی تک پہنچانے میں مدد کرے گا۔ انہوں نے کسانوں اور ان کے اہلِ خانہ سے آرگینک مصنوعات کے استعمال کی اپیل کی۔ شاہ نے بتایا کہ 1960 میں دودھ ساگر ڈیری میں روزانہ صرف 3,300 لیٹر دودھ جمع ہوتا تھا، جو اب بڑھ کر 35 لاکھ لیٹر روزانہ ہو گیا ہے۔ یہ ڈیری گجرات کے 1,250 دیہاتوں اور پانچ ریاستوں کے 10 لاکھ سے زائد دودھ پیدا کرنے والے گروپوں سے منسلک ہے، اور اس کا سالانہ ٹرن اوور 8,000 کروڑ روپے تک پہنچ گیا ہے۔

خواتین کی شمولیت سے بڑھے گی کسانوں کی آمدنی

امت شاہ نے کہا کہ بنسکانٹھا اور دودھ ساگر ڈیری نے مل کر دیہی معیشت کی تبدیلی کا ایک کامیاب ماڈل پیش کیا ہے۔ مودی حکومت نے ملک بھر میں 75,000 نئی پرائمری ڈیری کمیٹیاں قائم کی ہیں، تاکہ کوآپریٹیو اداروں کے ذریعے تیار ہونے والا دودھ بھارت اور بیرونِ ملک تک پہنچا کر مویشی پالنے والے کسانوں کو زیادہ منافع پہنچایا جا سکے۔آخر میں انہوں نے کہا کہ ’امول‘ کے کل ٹرن اوور میں 70 فیصد حصہ ماؤں اور بہنوں کا ہے، جو اس کے ذریعے خود مختار بن رہی ہیں۔

بھارت ایکسپریس اردو۔