Amit Shah gifts developmental projects to Uttarakhand: امت شاہ نے اتراکھنڈ کو 1508 کروڑ روپے کے ترقیاتی منصوبوں کا تحفہ دیا، کانگریس پر لگایا بدعنوانی اور دراندازوں کی حوصلہ افزائی کا الزام

دہرادون: مرکزی وزیر داخلہ امت شاہ نے جمعہ کو اتراکھنڈ کے یومِ تاسیس کی تقریب میں ریاست کو 1508 کروڑ روپے کے ترقیاتی منصوبوں کا تحفہ دیا۔ اس موقع پر انہوں نے لوک سبھا میں قائد حزب اختلاف راہل گاندھی اور کانگریس پر سخت تنقید کرتے ہوئے انتخابی فہرستوں کی خصوصی گہری نظرثانی (ایس آئی آر) کے خلاف اپوزیشن کی مہم کو ’درانداز بچاؤ یاترا‘ قرار دیا۔ تقریب میں وزیر اعلیٰ پشکر سنگھ دھامی نے امت شاہ کا استقبال کیا، جبکہ بڑی تعداد میں لوگوں نے شرکت کی۔ امت شاہ نے بتایا کہ ایک ہی دن میں 1508 کروڑ روپے کی لاگت کے 63 ترقیاتی منصوبوں کا سنگِ بنیاد رکھا گیا اور مکمل شدہ منصوبوں کا افتتاح کیا گیا۔ انہوں نے کہا کہ یہ اس بات کی علامت ہے کہ بی جے پی حکومت اتراکھنڈ کو ایک عظیم ریاست بنانے میں تعاون دینے والے تمام افراد کی خدمات کا اعتراف کرتی ہے۔

ہریش راوت حکومت پر بدعنوانی کے الزامات

مرکزی وزیر داخلہ نے کہا کہ گزشتہ دس برسوں میں بی جے پی نے بدعنوانی سے پاک انتظامیہ فراہم کرنے کی کوشش کی ہے۔ انہوں نے سابق وزیر اعلیٰ ہریش راوت کے دورِ حکومت پر تنقید کرتے ہوئے الزام لگایا کہ اس وقت سکریٹریٹ کمیشن اور رشوت خوری کا مرکز بن گیا تھا۔ انہوں نے مختلف اسٹنگ آپریشنز کا حوالہ دیتے ہوئے ایس سی/ایس ٹی اسکالرشپ گھوٹالے، شراب پالیسی سے متعلق اسٹنگ آپریشن اور کماؤں کے غذائی اجناس کی فراہمی میں مبینہ گھوٹالے کا ذکر کیا۔ امت شاہ نے عوام سے سوال کیا کہ وہ بی جے پی کی ترقی پر مبنی حکومت منتخب کرنا چاہتے ہیں یا راہل گاندھی کی قیادت والی ایسی حکومت جسے وہ بدعنوانی سے جوڑتے ہیں؟ انہوں نے الزام لگایا کہ کانگریس نے اتراکھنڈ کی معیشت کو منی آرڈر معیشت اور نقل مکانی پر منحصر رکھا تھا۔

سیاحت میں 380 فیصد اضافے کا دعویٰ

امت شاہ نے کہا کہ بی جے پی حکومت نے نقل مکانی روکنے اور ریاست میں صنعتی معیشت کو فروغ دینے کے لیے کام کیا ہے۔ ان کے مطابق اتراکھنڈ میں سیاحت کے شعبے میں 380 فیصد اضافہ ہوا ہے۔ انہوں نے دعویٰ کیا کہ ریاست کی مجموعی گھریلو پیداوار (جی ایس ڈی پی) میں 2022 کے بعد سے 50 فیصد اور فی کس آمدنی میں 40 فیصد اضافہ ہوا ہے، جبکہ ایک لاکھ کروڑ روپے کے صنعتی منصوبے زمین پر اتر چکے ہیں۔  انہوں نے سڑکوں کی تعمیر کا ذکر کرتے ہوئے کہا کہ پہلے یہ دلیل دی جاتی تھی کہ سڑکیں بنانے سے چین یا دیگر دشمن ملک میں داخل ہوسکتے ہیں، لیکن بی جے پی حکومت نے سڑکوں کا بنیادی ڈھانچہ مضبوط کیا۔ شاہ نے کہا کہ وزیر اعظم نریندر مودی کی قیادت میں ہندوستان اتنا مضبوط ہوگیا ہے کہ کوئی اس کی سرحدوں کی طرف بری نظر ڈالنے کی ہمت نہیں کرتا۔ انہوں نے سرجیکل اسٹرائیک اور آپریشن سندور کا حوالہ دیتے ہوئے کہا کہ ہندوستان نے دشمنوں کو مناسب جواب دیا ہے۔

مسلسل تیسری بار بی جے پی حکومت بنانے کا اعتماد

امت شاہ نے آئندہ اسمبلی انتخابات میں مسلسل تیسری بار بی جے پی کی حکومت بننے کا اعتماد ظاہر کیا۔ انہوں نے کہا کہ راہل گاندھی کے ریاست کے دوروں سے انتخابی نتائج پر کوئی فرق نہیں پڑے گا۔ وزیر اعظم مودی کی رہنمائی میں وزیر اعلیٰ پشکر سنگھ دھامی اتراکھنڈ کی ترقی کے لیے سرگرمی سے کام کر رہے ہیں۔ وزیر اعلیٰ دفتر کے ایک بیان کے مطابق، ریاست کے قیام کے 26 سال مکمل ہونے کے موقع پر حکومت پہاڑی علاقوں میں بنیادی ڈھانچے کو مضبوط بنانے، نوجوانوں کے لیے روزگار اور خود روزگار کے مواقع پیدا کرنے اور اتراکھنڈ کو سرمایہ کاری و سیاحت کے اہم مرکز کے طور پر ترقی دینے پر خصوصی توجہ دے رہی ہے۔ بیان میں کہا گیا کہ امت شاہ کی جانب سے ان منصوبوں کا افتتاح اور سنگِ بنیاد ریاست میں بنیادی سہولتوں کو وسعت دینے اور ترقی کی رفتار تیز کرنے میں اہم قدم ثابت ہوگا۔ واضح رہے کہ اتراکھنڈ ہر سال 9 نومبر کو اپنا یومِ تاسیس مناتا ہے۔ سال 2000 میں اتر پردیش سے الگ ہوکر یہ ہندوستان کی 27ویں ریاست بنا تھا۔ ہمالیہ کے دامن میں واقع اس پہاڑی ریاست کی سرحدیں شمال میں چین اور مشرق میں نیپال سے ملتی ہیں۔

–اے این آئی