Amit Shah Blasts Congress for Disrespecting PM Modi’s Mother: وزیر داخلہ امت شاہ نے وزیر اعظم مودی کو ماں کی گالی دینے کے معاملے میں کانگریس کو لیا آڑے ہاتھ، کہا-کانگریس میں تمام حدیں پار کر دیں

مرکزی وزیر داخلہ امت شاہ نے بہار کے ضلع دربھنگہ میں کانگریس اور راشٹریہ جنتا دل کے ایک حالیہ جلسے میں وزیر اعظم نریندر مودی اور ان کی مرحوم والدہ کے بارے میں استعمال کی گئی نازیبا زبان پر شدید ردعمل ظاہر کیا ہے۔ امت شاہ نے اس بیان کو نہ صرف قابل مذمت قرار دیا بلکہ اسے ’’جمہوریت پر ایک داغ‘‘ بھی کہا۔ اپنے ایک سخت بیان میں امت شاہ نے کہا کہ ’’بہار کے دربھنگہ میں کانگریس اور آر جے ڈی کے پلیٹ فارم سے عزت مآب وزیر اعظم نریندر مودی اور ان کی آنجہانی والدہ کے لیے جس طرح سے نازیبا زبان استعمال کی گئی، وہ نہ صرف قابل مذمت ہے، بلکہ ہماری جمہوریت پر ایک داغ بھی ہے۔‘‘

وزیر داخلہ امت شاہ نے کانگریس کی قیادت کو آڑے ہاتھوں لیتے ہوئے راہل گاندھی پر الزام عائد کیا کہ وہ ایک غریب ماں کے بیٹے کی کامیابی کو برداشت نہیں کر پا رہے ہیں۔ انھوں نے کہا کہ وزیر اعظم مودی نے گزشتہ 11 برسوں میں ملک کو ترقی کی راہ پر ڈالا ہے، جو اپوزیشن کو ہضم نہیں ہو رہا۔ وزیر داخلہ نے کہا ’’راہل گاندھی کی قیادت میں کانگریس کی سیاست اپنی بدترین سطح پر پہنچ گئی ہے… وہ یہ برداشت نہیں کر پا رہی ہے کہ کس طرح ایک غریب ماں کا بیٹا… ملک کو مسلسل آگے لے جا رہا ہے۔‘‘

امت شاہ نے مزید کہا کہ گاندھی خاندان نے پی ایم مودی کے خلاف نفرت انگیز مہم ان کے گجرات کے وزیر اعلیٰ کے دور سے ہی جاری رکھی ہے، لیکن اس نےاب تمام حدیں پار کر دی ہیں۔ انھوں نے کہا کہ ’’یہ ہر ماں، ہر بیٹے کی توہین ہے، جس کے لیے 140 کروڑ ملک والے انھیں کبھی معاف نہیں کریں گے۔‘‘ واضح رہے کہ دربھنگہ میں راہل گاندھی کی پدیاترا سے آنے والی ایک ویڈیو نے نیا تنازعہ کھڑا کر دیا ہے۔ ویڈیوں میں ہجوم کو پی ایم مودی کو گالی دیتے ہوئے سنا جا سکتا ہے، تاہم اب تک کانگریس کی طرف سے اس پر کوئی باضابطہ ردعمل سامنے نہیں آیا ہے۔

بھارت ایکسپریس اردو