Delhi Air Quality Index: دہلی میں فضائی آلودگی میں خطرناک حدتک اضافہ،اے کیوآئی382 کے پار، دہلی میں موسم کی سرد ترین صبح ریکارڈ

قومی دارالحکومت نئی دہلی میں گہری دھند کی چادر چھائی رہی اور فضا میں آلودگی خطرناک حد تک بڑھ گئی۔ مرکزی آلودگی کنٹرول بورڈ  کے اعداد و شمار کے مطابق، دہلی کا ایئر کوالٹی انڈیکس (اے کیوآئی) ہفتہ کی صبح 384 پر ریکارڈ کیا گیا، جو ‘شدید’ زمرے میں آتا ہے۔۔ دوسری جانب اس سال دسمبر کی سب سے سرد صبح بھی یہی رہی، جب کم سے کم درجہ حرارت گر کر 5.6 ڈگری سیلسیس تک پہنچ گیا۔دہلی کے لوگوں کو سردیوں کے دوران خاص طور پر اکتوبر سے جنوری تک انتہائی زہریلی ہوا میں سانس لینے پر مجبور ہیں۔ یہی وجہ ہے کہ دارالحکومت دہلی دنیا میں سب سے زیادہ آلودگی والے شہروں کی فہرست میں سرفہرست ہے۔ایئر کوالٹی وارننگ سسٹم کے مطابق اگلے چند دنوں تک شہر کی ہوا کا معیار ‘انتہائی خراب’ زمرے میں رہنے کی توقع ہے۔ماہرین کا کہنا ہے کہ آلودگی کی بڑھتی ہوئی سطح سانس اور دل کی بیماریوں کا خطرہ بڑھاتی ہے۔ لوگوں کو مشورہ دیا گیا ہے کہ باہر نکلتے وقت ماسک پہنیں اور غیر ضروری سفر سے گریز کریں۔

39 میں سے 31 مانیٹرنگ اسٹیشن ‘بہت خراب’ سطح پر

سی پی سی بی کے ’سمیر‘ ایپ کے مطابق شام چھ بجے تک 39 میں سے 31 ایئر کوالٹی مانیٹرنگ اسٹیشن ’بہت خراب‘ کیٹگری میں پہنچ گئے۔ آر کے پورم میں AQI 370 ریکارڈ ہوا، جو دن کے سب سے بلند اعداد میں شامل تھا۔

سی پی سی بی کے معیار

سی پی سی بی کے مطابق:

• 0 تا 50 — اچھا
• 51 تا 100 — اطمینان بخش
• 101 تا 200 — درمیانہ
• 201 تا 300 — خراب
• 301 تا 400 — بہت خراب
• 401 تا 500 — شدید

5 دسمبر: موسم کا سب سے سرد دن

دوسری جانب محکمہ موسمیات کے مطابق جمعہ کو دہلی کا زیادہ سے زیادہ درجہ حرارت 23.5 ڈگری جبکہ کم سے کم درجہ حرارت 5.6 ڈگری سیلسیس رہا، جو معمول سے 3.9 ڈگری کم ہے اور اس سیزن کا سب سے کم درجہ حرارت ہے۔ اس سے قبل دسمبر کی سب سے سرد صبح 12 دسمبر 2024 کو ریکارڈ ہوئی تھی، جب درجہ حرارت 4.5 ڈگری تک پہنچا تھا۔

آج ہلکے کہرے کا امکان

محکمہ موسمیات کے مطابق جمعہ کی شام نمی کا تناسب 68 فیصد رہا، جبکہ صبح کے وقت یہ 100 فیصد تک پہنچ گیا۔ ہفتہ کے روز بھی ہلکے کہرے کا امکان ہے اور درجہ حرارت 8 سے 23 ڈگری سیلسیس کے درمیان رہنے کی پیش گوئی کی گئی ہے۔

بھارت ایکسپریس اردو