Rahul Kaswan Joins Congress: راہل کاسوان نے تھاما کانگریس کا ‘ہاتھ’، چند گھنٹے قبل ہی بی جے پی سے دیا تھا استعفیٰ

Rahul Kaswan Joins Congress: راجستھان میں بی جے پی کو بڑا جھٹکا لگا ہے۔ چورو کے ایم پی راہل کاسوان پیر (11 مارچ) کو کانگریس میں شامل ہوئے۔ کاسوان ٹکٹ کاٹے جانے سے ناراض تھے۔ اس سے قبل انہوں نے بی جے پی سے استعفیٰ دیا تھا۔ کانگریس صدر ملکارجن کھڑگے نے جاٹ برادری سے تعلق رکھنے والے کاسوان کو پارٹی میں شامل کیا ہے۔ کانگریس میں شامل ہونے کے بعد ایم پی راہل کاسوان نے کہا کہ میں کانگریس پارٹی کا شکریہ ادا کرتا ہوں۔ میں اپنے لوک سبھا حلقہ کے لوگوں کی آواز سن کر اسی طرح کام کرتا رہوں گا۔‘‘

راہل کاسوان نے بی جے پی سے استعفیٰ دیتے ہوئے کیا کہا؟

میرا چورو لوک سبھا پریوار ہیش ٹیگ کے ساتھ راہل کاسوان نے ٹویٹر پر بی جے پی سے استعفیٰ دینے کا اعلان کیا۔ انہوں نے کہا، ’’رام-رام، میرا چورو لوک سبھا پریوار… میرے پریوار کے لوگ! آپ سب کے جذبات کے مطابق میں عوامی زندگی میں ایک بڑا فیصلہ لینے جا رہا ہوں۔ سیاسی وجوہات کی بنا پر، آج اسی لمحے، میں بھارتیہ جنتا پارٹی کی بنیادی رکنیت اور رکن پارلیمنٹ کے عہدے سے استعفیٰ دے رہا ہوں۔

انہوں نے مزید کہا، ”میں راہل کاسوان، پوری بھارتیہ جنتا پارٹی، قومی صدر جے پی  نڈا جی، وزیر اعظم نریندر مودی اور امت شاہ کا شکریہ ادا کرتا ہوں، جنہوں نے مجھے 10 سال تک چورو لوک سبھا خاندان کی خدمت کرنے کا موقع دیا۔ میرے چورو لوک سبھا خاندان کا خصوصی شکریہ، جنہوں نے ہمیشہ مجھے قیمتی تعاون اور آشیرواد دیا۔

یہ بھی پڑھیں- History of SBI: کیا ہے 48 کروڑ سے بھی زیادہ صارفین والے SBI کی تاریخ، جانئے یہ ہندوستان میں کیسے آیا

بی جے پی نے دیویندر جھاجھریا کو بنایا اپنا امیدوار

آپ کو بتا دیں کہ بی جے پی نے 2 فروری کو امیدواروں کی فہرست جاری کی تھی۔ پارٹی نے پیرا اولمپک کھلاڑی دیویندر جھاجھریا کو چورو سیٹ سے اپنا امیدوار بنایا ہے۔ کاسوان نے اس فیصلے پر ناراضگی کا اظہار کیا۔ اس کے ساتھ انہوں نے 8 مارچ کو طاقت کا مظاہرہ کیا۔ اس کے بعد کاسوان کے کانگریس میں شامل ہونے کی قیاس آرائیاں شروع ہوگئیں۔ مانا جا رہا ہے کہ کانگریس انہیں چورو سیٹ سے امیدوار بنا سکتی ہے۔

-بھارت ایکسپریس