Adani Group Chairman Gautam Adani: مقامی روزگار اور باوقار زندگی اڈانی گروپ کی ترجیح، اڈانی کا یوم مزدور پر بڑا اعلان

نئی دہلی: گوتم اڈانی نے کہا ہے کہ اڈانی گروپ کی ترقیاتی حکمت عملی کا مرکز مقامی روزگار کو فروغ دینا اور کارکنوں کو باوقار زندگی فراہم کرنا ہے۔ انہوں نے یہ بات عالمی یومِ مزدور کے موقع پر کمپنی کے ملازمین سے خطاب کرتے ہوئے کہی۔گوتم اڈانی کا یہ بیان ایسے وقت سامنے آیا ہے جب اڈانی گروپ تیزی سے اپنے کاروبار کو وسعت دے رہا ہے اور سرمایہ کاری میں نمایاں اضافہ کر رہا ہے۔ انہوں نے کہا کہ گروپ اپنی کامیابی کو صرف مالی اعداد و شمار سے نہیں بلکہ تخلیق کردہ اثاثوں، مستحکم روزگار اور مضبوط کمیونٹیز کی بنیاد پر جانچے گا۔

اڈانی نے ملازمین کو مخاطب کرتے ہوئے کہا، “آپ صرف کارکن نہیں بلکہ قوم کے معمار ہیں۔ جب ہم کسی پروجیکٹ کو مکمل کرتے ہیں تو ہم صرف ایک کام ختم نہیں کرتے بلکہ ملک کے مستقبل کو تشکیل دیتے ہیں۔” اڈانی گروپ اس وقت ملک کی 24 ریاستوں میں 700 سے زائد منصوبوں پر کام کر رہا ہے اور تقریباً چار لاکھ افراد اس سے وابستہ ہیں۔انہوں نے واضح کیا کہ گروپ اپنے تمام پروجیکٹس میں مقامی بھرتی کو ترجیح دے گا۔ سب سے پہلے پروجیکٹ کے آس پاس کے علاقوں کے لوگوں کو روزگار دیا جائے گا، اس کے بعد ریاست کے دیگر حصوں سے اور آخر میں ضرورت پڑنے پر بیرونِ ریاست افراد کو مواقع فراہم کیے جائیں گے۔مزدوروں کی فلاح کو کمپنی کی حکمت عملی کا اہم ستون قرار دیتے ہوئے انہوں نے بتایا کہ گجرات کے مندرا اور کھاوڑا میں 50 ہزار کارکنوں کے لیے جدید رہائشی سہولیات تعمیر کی جا رہی ہیں۔ اس کے علاوہ مندرا میں ایک مرکزی کلاؤڈ کچن بھی قائم کیا جا رہا ہے جو روزانہ ایک لاکھ غذائیت سے بھرپور کھانے فراہم کرے گا، تاکہ دور دراز علاقوں میں کام کرنے والے ملازمین کے معیارِ زندگی کو بہتر بنایا جا سکے۔

گوتم اڈانی نے کہا، “یہ کوئی عیش و عشرت نہیں بلکہ ضرورت ہے۔ ہر کارکن کو باعزت زندگی گزارنے اور کام کرنے کا حق حاصل ہے۔” انہوں نے بتایا کہ گروپ کی حکمت عملی تین بنیادی ستونوں پر مبنی ہے، جس میں مضبوط مالی وسائل، تیز رفتار فیصلہ سازی اور مؤثر عمل درآمد شامل ہیں۔انہوں نے مزید کہا کہ ایک نئی تین سطحی تنظیمی ساخت متعارف کرائی جا رہی ہے، جس سے فیصلوں میں تیزی آئے گی اور پروجیکٹس کی تکمیل کا وقت کم ہوگا۔ اس کے ساتھ ہی گروپ محدود مگر بڑے اور قابل اعتماد ٹھیکیداروں کے ساتھ شراکت داری کرے گا تاکہ کام کی رفتار اور معیار کو بہتر بنایا جا سکے۔

انہوں نے مثال دیتے ہوئے بتایا کہ گجرات کے کچھ علاقے میں ایک مقامی کاروباری شخص نے چھوٹے پیمانے سے آغاز کرکے بڑی سطح پر کاروبار قائم کیا، جس سے مقامی روزگار کے مواقع پیدا ہوئے۔تعلیم اور ہنر مندی کو تیسرا اہم ستون قرار دیتے ہوئے انہوں نے کہا کہ آنے والے ادانی اسکل سینٹرز کے ذریعے کارکنوں کو غیر ہنر مند سطح سے لے کر قیادت کے عہدوں تک ترقی کے مواقع فراہم کیے جائیں گے۔انہوں نے موندرا پورٹ، نوی ممبئی بین الاقوامی ائیر پورٹ اور گنگا ایکسپریس وے جیسے بڑے منصوبوں کا ذکر کرتے ہوئے کہا کہ یہ صرف ترقیاتی منصوبے نہیں بلکہ ملک کی معاشی ترقی کے اہم ستون ہیں۔

بھارت ایکسپریس اردو