A traditional remedy for summer relief: گرمیوں میں راحت کا دیسی نسخہ شکنجی: توانائی سے بھرپور، قوتِ مدافعت بڑھانے اور وزن کنٹرول کرنے میں بھی مددگار

نئی دہلی: گرمیوں کا موسم شروع ہوتے ہی ملک کے کئی حصوں میں درجہ حرارت تیزی سے بڑھنے لگتا ہے، جس کے باعث جسم میں پانی کی کمی، تھکن اور ہاضمے سے متعلق مسائل عام ہو جاتے ہیں۔ ایسے میں ایک سادہ، گھریلو اور ذائقہ دار مشروب شکنجی ان تمام مشکلات سے نجات دلانے میں نہایت مؤثر ثابت ہوتا ہے۔ یہ نہ صرف فوری ٹھنڈک اور تازگی فراہم کرتا ہے بلکہ صحت کے متعدد فوائد بھی رکھتا ہے۔

شکنجی: آسان تیاری اور بہترین ذائقہ

شکنجی ایک روایتی مشروب ہے جو لیموں، پانی، کالا نمک، زیرہ پاؤڈر اور چینی سے تیار کیا جاتا ہے۔ کچھ لوگ اس میں ادرک کا رس اور پودینے کے پتے بھی شامل کرتے ہیں، جس سے اس کا ذائقہ اور افادیت مزید بڑھ جاتی ہے۔ شمالی ہندوستان میں یہ گرمیوں کا نہایت مقبول مشروب ہے اور اکثر سڑکوں پر مٹی کے برتنوں میں ٹھنڈی شکنجی فروخت ہوتی نظر آتی ہے۔ گھر پر شکنجی بنانا بھی بے حد آسان ہے۔ ایک جگ میں دو گلاس ٹھنڈا پانی ڈالیں، اس میں ایک یا دو لیموں نچوڑیں، حسبِ ذائقہ کالا نمک، زیرہ پاؤڈر اور تھوڑی چینی شامل کریں۔ اگر چاہیں تو باریک کٹا پودینہ اور ادرک بھی ڈال سکتے ہیں۔ اچھی طرح مکس کرکے پیش کریں۔ بغیر چینی کے بھی شکنجی تیار کی جا سکتی ہے۔

ہاضمے اور صحت کے لیے مفید

شکنجی کا سب سے بڑا فائدہ اس کا نظامِ ہاضمہ پر مثبت اثر ہے۔ لیموں میں موجود وٹامن سی اور فائبر ہاضمہ کو مضبوط بناتے ہیں، جبکہ زیرہ اور ادرک گیس، تیزابیت اور بدہضمی کو دور کرنے میں مدد دیتے ہیں۔ اس کے باقاعدہ استعمال سے معدہ صحت مند رہتا ہے اور کھانا آسانی سے ہضم ہوتا ہے۔ گرمی کے موسم میں جسم جلد تھک جاتا ہے اور پانی کی کمی ہو جاتی ہے۔ شکنجی جسم کو ہائیڈریٹ رکھنے کے ساتھ ساتھ ضروری معدنیات کی کمی بھی پوری کرتی ہے۔ اس سے تھکن کم ہوتی ہے اور فوری توانائی ملتی ہے۔ ساتھ ہی یہ جسم کے درجہ حرارت کو متوازن رکھتی ہے اور گرمی کے اثرات سے بچاتی ہے۔

قوت مدافعت اور جلد کے لیے فائدہ مند

لیموں میں موجود وٹامن سی قوتِ مدافعت کو مضبوط بناتا ہے، جس سے انفیکشن سے بچاؤ میں مدد ملتی ہے۔ اس کے علاوہ شِکنجی کا باقاعدہ استعمال جلد کی رنگت کو نکھارتا ہے اور جسم میں تازگی کا احساس پیدا کرتا ہے۔ بعض ماہرین کے مطابق یہ جوڑوں کے درد میں بھی ہلکی راحت فراہم کر سکتی ہے۔ شکنجی جسم سے زہریلے مادوں کو خارج کرنے میں مدد دیتی ہے۔ لیموں میں موجود پیکٹین فائبر بھوک کو کنٹرول کرتا ہے جبکہ زیرہ اور ادرک میٹابولزم کو تیز کرتے ہیں، جس سے وزن کم کرنے میں آسانی ہوتی ہے۔ ماہرینِ آیوروید کے مطابق، گھر پر تیار کی گئی تازہ شکنجی بازار میں ملنے والے پیکٹ والے مشروبات کے مقابلے میں کہیں زیادہ صحت بخش ہے۔ گرمیوں کے موسم میں اسے روزمرہ معمول کا حصہ بنا کر نہ صرف جسم کو ٹھنڈک پہنچائی جا سکتی ہے بلکہ مجموعی صحت کو بھی بہتر بنایا جا سکتا ہے۔

بھارت ایکسپریس اردو۔