Alert in 9 states over Cyclone Arnab: سمندری طوفان ’ارنب‘ کے پیش نظر 9 ریاستوں میں الرٹ، 140 کلومیٹر فی گھنٹہ کی رفتار سے چلیں گی ہوائیں، اڈیشہ میں اسکول بند

نئی دہلی : خلیج بنگال میں اٹھا سمندری طوفان ’ارنب‘ تیزی سے آندھرا پردیش کے ساحلی علاقوں کی جانب بڑھ رہا ہے۔ محکمہ موسمیات ہند (آئی ایم ڈی) کے مطابق، یہ انتہائی شدید سمندری طوفان میں تبدیل ہو چکا ہے اور اگلے 12 گھنٹوں میں مزید خطرناک شکل اختیار کر سکتا ہے۔ اندازہ ہے کہ منگل، 28 اکتوبر کی صبح یہ باپٹلا اور وشاکھاپٹنم کے درمیان ساحل سے ٹکرائے گا۔ خطرے کی سنگینی کو دیکھتے ہوئے مرکزی حکومت نے آندھرا پردیش اور اڈیشہ سمیت کئی ریاستوں میں الرٹ جاری کر دیا ہے۔محکمہ موسمیات کے مطابق، طوفان کے ساحل سے ٹکرانے کے دوران 115 سے 125 کلومیٹر فی گھنٹہ کی رفتار سے ہوائیں چل سکتی ہیں۔ ان کی رفتار بڑھ کر 140 کلومیٹر فی گھنٹہ تک پہنچنے کا بھی امکان ہے۔ طوفان کے خطرے کے پیش نظر 27 اور 28 اکتوبر کو تقریباً 53 ٹرینیں منسوخ کر دی گئی ہیں۔ اس سے وجے واڑہ، راجمندری، مچلی پٹنم، نرساپور، بھیماورم، کاکیناڈا پورٹ، گنٹور اور وشاکھاپٹنم سے چلنے والی اور ان شہروں سے گزرنے والی ٹرینوں کے راستے متاثر ہوئے ہیں۔ اس دوران ریلوے نے لوگوں کی مدد کے لیے 24 گھنٹے سرگرم رہنے والے کنٹرول روم قائم کیے ہیں۔

کئی ریاستوں میں الرٹ جاری

آئی ایم ڈی کے مطابق، پیر کی صبح ساڑھے 5 بجے سمندری طوفان خلیج بنگال کے وسطی مشرقی اور اس سے متصل وسطی مغربی حصے میں مرکوز تھا۔ گزشتہ 6 گھنٹوں کے دوران یہ 15 کلومیٹر فی گھنٹہ کی رفتار سے مغرب کی جانب بڑھا ہے۔طوفان ’ارناب‘ کے خطرے کے پیش نظر آندھرا پردیش، اڈیشہ، تلنگانہ، چھتیس گڑھ، بہار اور مشرقی اتر پردیش سمیت 9 ریاستوں میں الرٹ جاری کیا گیا ہے۔ مرکز کے زیر انتظام علاقے پڈوچیری میں بھی احتیاطی اقدامات تیز کر دیے گئے ہیں۔

شدید بارش کا امکان

سمندری طوفان کے اثر سے 27 اور 28 اکتوبر کو اڈیشہ کے بعض علاقوں میں انتہائی شدید بارش ہو سکتی ہے۔ 28 اور 29 اکتوبر کو چھتیس گڑھ میں بھی انتہائی شدید بارش کا امکان ظاہر کیا گیا ہے۔اس کے علاوہ 28 اکتوبر کو تلنگانہ، 29 اور 30 اکتوبر کو بہار اور مشرقی اتر پردیش کے بعض علاقوں میں شدید بارش ہونے کا خدشہ ہے۔ مشرقی مدھیہ پردیش میں بھی 29 اکتوبر کو بہت شدید بارش ہو سکتی ہے۔

اڈیشہ میں اسکول بند، لوگوں کو محفوظ مقامات پر منتقل کیا جا رہا ہے

اڈیشہ حکومت نے سمندری طوفان ’ارناب‘ کے 28 اکتوبر کو ساحل سے ٹکرانے کے خدشے کے پیش نظر پیر کو 6 اضلاع کے تمام تعلیمی اداروں کو بند رکھنے کا اعلان کیا۔ حکومت نے یہ بھی بتایا کہ حساس علاقوں سے لوگوں کو محفوظ مقامات پر منتقل کرنے کا عمل شروع کر دیا گیا ہے۔وزیر اعلیٰ نے کہا کہ اگرچہ انتہائی شدید سمندری طوفان کے آندھرا پردیش اور پڈوچیری کے علاقے یانم کے درمیان ساحل سے ٹکرانے کا امکان ہے، لیکن اڈیشہ پر بھی اس کا وسیع اثر پڑے گا۔ ریاست میں بہت شدید بارش اور 80 کلومیٹر فی گھنٹہ تک کی رفتار سے ہوائیں چلنے کا امکان ہے۔ریاست کے 6 حساس اضلاع میں سمندر میں مچھلیاں پکڑنے کے ساتھ پہاڑیوں، آبشاروں، ڈیموں اور سیاحتی مقامات پر جانے پر بھی پابندی عائد کر دی گئی ہے۔ حکومت نے جنوبی اڈیشہ کے حساس اضلاع گنجام، گجپتی، رائے گڑھ، ملکان گری، کوراپٹ اور نبرنگ پور میں ملازمین اور مشینری پہلے ہی تعینات کر دی ہے۔

آندھرا پردیش میں این ڈی آر ایف کی 15 ٹیمیں تعینات

آندھرا پردیش حکومت نے طوفان ’ارنب‘ کے باعث شدید بارش اور تیز ہوائیں چلنے کے خدشے کے درمیان پیر کو راحتی کاموں کے لیے 20 اضلاع کو 27 کروڑ روپے جاری کیے۔ طوفان کے 28 اکتوبر کو ساحل سے ٹکرانے کے امکان کے پیش نظر حساس علاقوں میں قومی آفات سے نمٹنے والی فورس (این ڈی آر ایف) کی 15 ٹیمیں تعینات کی گئی ہیں۔حکومت کی جانب سے جاری بیان کے مطابق، طوفان سے متاثر ہونے والے علاقوں میں احتیاطی تدابیر کے طور پر تعلیمی اداروں کو بند رکھنے کا حکم دیا گیا ہے۔ ساحلوں پر لوگوں کی آمدورفت پر پابندی عائد کر دی گئی ہے۔ لوگوں کی حفاظت کو یقینی بنانے کے لیے منگل کی دوپہر سے ساحلی سڑکوں پر آمدورفت بھی روک دی جائے گی۔پینے کے پانی کی قلت سے نمٹنے کے لیے ضرورت کے مطابق 2,613 ہنگامی واٹر ٹینکر تیار رکھے گئے ہیں۔

مرکزی حکومت بھی الرٹ، اعلیٰ سطحی میٹنگ میں تیاریوں کا جائزہ

خلیج بنگال میں اٹھنے والے سمندری طوفان ’ارنب‘ کے پیش نظر مرکزی حکومت نے بھی اپنی چوکسی بڑھا دی ہے۔ کابینہ سکریٹری ڈاکٹر ٹی وی سومناتھن نے پیر کو نئی دہلی میں قومی بحران انتظامی کمیٹی (این سی ایم سی) کی میٹنگ کی صدارت کی۔ اس دوران طوفان سے نمٹنے کے لیے مرکزی ایجنسیوں اور ممکنہ طور پر متاثر ہونے والی ریاستوں کی تیاریوں کا جائزہ لیا گیا۔میٹنگ میں آندھرا پردیش، اڈیشہ، تلنگانہ، چھتیس گڑھ اور مرکز کے زیر انتظام علاقے پڈوچیری کے چیف سکریٹریوں اور سینئر افسران نے کمیٹی کو طوفان کے ممکنہ راستے میں آنے والے لوگوں کی حفاظت کے لیے کیے جا رہے اقدامات سے آگاہ کیا۔ حکومت کی توجہ متاثرہ علاقوں میں لوگوں کو محفوظ مقامات پر منتقل کرنے، راحتی انتظامات اور ضروری خدمات کو برقرار رکھنے پر ہے۔

بھارت ایکسپریس اردو