Bangladesh: محمد یونس نے کیا بنگلہ دیش میں اگلے عام انتخابات کی تاریخ کا اعلان، بقرعید پر عوام سے خطاب کرتے ہوئے دلایا شفاف انتخابات کا یقین

بنگلہ دیش میں عام انتخابات کے لیے سیاسی پارٹیوں اور فوج کے دباؤ کے درمیان بنگلہ دیش کی عبوری حکومت کے سربراہ محمد یونس نے جمعہ کو انتخابات کی تاریخ کا اعلان کیا۔ انھوں نے کہا کہ بنگلہ دیش میں انتخابات اپریل 2026 کے پہلے نصف میں ہوں گے۔ بقرعید کے موقع پر ایک ٹیلی ویژن خطاب کے دوران محمد یونس نے کہا کہ الیکشن کمیشن ’’مناسب وقت‘‘ پر انتخابات کے روڈ میپ کا اعلان کرے گا۔

محمد یونس نے مزید کہا کہ ’’حکومت نے تاریخ کے سب سے آزاد، منصفانہ، مسابقتی اور قابل قبول انتخابات کے انعقاد کے لیے تمام جماعتوں سے بات چیت کی ہے۔‘‘ محمد یونس کے اس اعلان کے بعد طالب علموں کی نیشنل سٹیزن پارٹی نے کہا کہ وہ قومی انتخابات کے انعقاد پر اعتراض نہیں کرے گی ’’اگر اصلاحات اور انصاف کو یقینی بنایا جائے تاکہ انتظامیہ کی غیر جانبداری کو یقینی بنایا جا سکے۔‘‘

نیشنل سٹیزن پارٹی نے کیا نئے آئین کے نفاذ کے لیے آئین ساز اسمبلی کا مطالبہ

پارٹی کے ممبر اختر حسین نے مطالبہ کیا کہ ’’انتخابات کے انعقاد سے پہلے اصلاحات کو نظر آنا چاہیے اور قومی توقعات کے مطابق ایک نئے آئین کو نافذ کرنے کے لیے آئین ساز اسمبلی کے انتخابات کا اہتمام کیا جانا چاہیے۔‘‘ واضح رہے کہ نوبل انعام یافتہ ماہر اقتصادیات محمد یونس نے شیخ حسینہ کے وزیر اعظم کے عہدے سے مستعفی ہونے اور 5 اگست کو ہندوستان فرار ہونے کے تین دن بعد بنگلہ دیش کی عبوری حکومت کے چیف ایڈوائزر کا عہدہ سنبھالا تھا اور تب سے وہ بنگلہ دیش کی عبوری حکومت کے سربراہ ہیں۔

جمعہ کے روز اپنے خطاب میں محمد یونس نے کہا کہ ہم ایسے انتخابات چاہتے ہیں جو بغاوت کے شہداء کی روحوں کو مطمئن کریں اور ان کی روحوں کو سکون حاصل ہو۔ انھوں نے مزید کہا کہ ’’ہم چاہتے ہیں کہ اگلے انتخابات میں ووٹرز، امیدواروں اور پارٹیوں کی تعداد اب تک کی سب سے زیادہ شرکت ریکارڈ کرے۔‘‘

بھارت ایکسپریس اردو