Israel-Gaza War: غزہ میں جنگ بندی سے متعلق نئی پیش رفت، سلامتی کونسل میں امریکی قرارداد پر رائے شماری متوقع

فلسطین کے جنگ زدہ علاقے غزہ میں فوری جنگ بندی، اسرائیل اورحماس کے درمیان قیدیوں کے تبادلے کے معاہد، غزہ میں فوری امداد کی فراہمی کوسہل بنانے اورفلسطینی ریاست کے قیام کے حوالے سے پیش رفت سے متعلق اقوام متحدہ کی سلامتی کونسل میں پیش کی گئی امریکہ کی قرارداد پرآج (جمعہ کو) رائے شماری متوقع ہے۔ قبل ازیں امریکی وزیرخارجہ انٹونی بلنکن نے ’العربیہ‘ اور’الحدث‘ کے ساتھ براہ راست گفتگو کرتے ہوئے کہا تھا کہ امریکہ نے سلامتی کونسل میں ایک قرارداد پیش کی ہے، جس میں غزہ میں انسانی بنیادوں پرفوری جنگ بندی اور قیدیوں کی رہائی کا مطالبہ کیا گیا ہے۔ انہوں نے کہا کہ توقع ہے کہ سلامتی کونسل کے رکن ممالک اس قرارداد کی مکمل حمایت کریں گے۔ ان کا کہنا تھا کہ یہ قرارداد ایک مضبوط اورمؤثر پیغام ہے۔

امریکی وزیر خارجہ انٹونی بلنکن نے جمعرات کو دیئے گئے انٹرویومیں تمام ممالک پرزوردیا کہ وہ غزہ کی پٹی میں جنگ بندی کے حوالے سے امریکی قرارداد کی حمایت کریں۔ قبل ازیں امریکی وزیرخارجہ نے قاہرہ میں 6 عرب ممالک کے وزرائے خارجہ سے ملاقات کی۔ ان ممالک کا قاہرہ میں امریکی وزیر خارجہ کی آمد سے قبل اجلاس ہوا، جس میں انہوں نے غزہ میں فوری اورجامع جنگ بندی کی ضرورت پرزوردیا۔