Prime Minister Narendra Modi: بھارتی برادری نے نیس میں وزیر اعم مودی کا  پُرجوش استقبال، مودی نے بھارتی کمیونٹی کا شکریہ ادا کرتے ہوئے اسے ایک یادگار لمحہ قرار دیا

نئی دہلی : وزیراعظم نریندر مودی کے فرانس پہنچنے پر نیس شہر میں مقیم بھارتی برادری نے ان کا پرتپاک استقبال کیا۔ اس موقع پر بڑی تعداد میں بھارتی نژاد افراد جمع ہوئے اور وزیراعظم کا خیرمقدم کیا۔ وزیراعظم مودی نے اس محبت اور احترام پر بھارتی کمیونٹی کا شکریہ ادا کرتے ہوئے اسے ایک یادگار لمحہ قرار دیا۔وزیراعظم مودی نے سوشل میڈیا پلیٹ فارم “ایکس” پر ایک پوسٹ میں کہا، “نیس میں بھارتی برادری کی جانب سے کیا گیا استقبال میرے لیے ہمیشہ یادگار رہے گا۔ اگرچہ یہ لوگ وطن سے ہزاروں کلومیٹر دور رہتے ہیں، لیکن بھارت کے ساتھ ان کا تعلق آج بھی اتنا ہی مضبوط اور گہرا ہے۔”فرانس پہنچنے کے بعد وزیراعظم نے اپنے دورے کی تفصیلات بھی شیئر کیں۔ انہوں نے بتایا کہ نیس کے علاوہ ان کے دورۂ فرانس میں ایویان اور پیرس کے پروگرام بھی شامل ہیں۔ انہوں نے کہا کہ اس دوران دوطرفہ اور کثیرالجہتی سطح پر اہم ملاقاتیں اور مذاکرات ہوں گے، جن کا مقصد مختلف ترقیاتی شراکت داروں کے ساتھ بھارت کے تعلقات کو مزید مضبوط بنانا ہے۔ وزیراعظم نے فرانسیسی صدر ایمانوئل میکرون سے ملاقات اور “بھارت انوویٹس” پروگرام میں شرکت کے لیے اپنے جوش و خروش کا بھی اظہار کیا۔

وزارتِ خارجہ کے ترجمان رندھیر جیسوال کے مطابق وزیراعظم کا یہ دورہ بھارت اور فرانس کے درمیان مختلف شعبوں میں تعاون کو مزید فروغ دینے کا ایک اہم موقع ثابت ہوگا۔ انہوں نے کہا کہ دونوں ممالک نے سال 2026 کو “ایئر آف انوویشن” کے طور پر منانے کا فیصلہ کیا ہے، جس کے تحت اختراع، ٹیکنالوجی اور اسٹارٹ اپس کے شعبوں میں خصوصی توجہ دی جائے گی۔وزارت خارجہ کے مطابق “بھارت انوویٹس” ایک ایسا بین الاقوامی پلیٹ فارم ہے جہاں بھارت کے انوویشن ایکو سسٹم کو عالمی سطح پر پیش کیا جائے گا۔ اس پروگرام میں بھارتی اسٹارٹ اپس، نوجوان موجدین اور ٹیکنالوجی ماہرین کو اپنے جدید ترین حل اور مصنوعات عالمی سرمایہ کاروں اور صنعت کاروں کے سامنے پیش کرنے کا موقع ملے گا۔

وزیراعظم مودی فرانس میں منعقد ہونے والے جی7 سربراہی اجلاس میں بھی شرکت کریں گے۔ اس کے علاوہ وہ فرانسیسی صدر ایمانوئل میکرون کے ساتھ مل کر “بھارت انوویٹس 2026” کا باضابطہ افتتاح بھی کریں گے۔ یہ تقریب “انڈیا-فرانس ایئر آف انوویشن” کے تحت منعقد کی جا رہی ہے، جس کا مقصد بھارتی اسٹارٹ اپس کو عالمی سرمایہ کاروں سے جوڑنا اور اعلیٰ تعلیمی اداروں میں ہونے والی تحقیق اور اختراعات کو فروغ دینا ہے۔فرانس کے دورے کے بعد وزیراعظم نریندر مودی 14 سے 15 جون تک سلوواکیہ کے دو روزہ سرکاری دورے پر روانہ ہوں گے۔ انہوں نے کہا کہ 1993 میں سلوواکیہ کی آزادی کے بعد کسی بھی بھارتی وزیراعظم کا یہ پہلا دورہ ہوگا۔ براتیسلاوا میں وہ صدر پیٹر پیلیگرینی اور وزیراعظم رابرٹ فیکو سے ملاقات کریں گے، جب کہ سلوواکیہ کے کاروباری اور صنعتی رہنماؤں سے بھی تبادلہ خیال کریں گے۔ وزیراعظم کے مطابق یہ دورہ بھارت اور یورپی یونین کے درمیان مجوزہ آزاد تجارتی معاہدے (FTA) کی سمت جاری پیش رفت کو مزید رفتار دینے میں مددگار ثابت ہوگا۔

بھارت ایکسپریس اردو