Hamas Hands Over Body of Israeli Soldier : حماس نے لیفٹیننٹ حیدر گولڈن کی لاش اسرائیل کو سونپ دی،11 سال پہلے ایک آپریشن میں ہوئے تھے ہلاک

یروشلم: گیارہ سال کے طویل انتظار کے بعد فلسطینی تنظیم حماس نے اسرائیل کے فوجی لیفٹیننٹ حیدر گولڈن کی لاش اسرائیلی حکام کے حوالے کر دی ہے۔ وزیراعظم بنیامین نیتن یاہو نے اتوار کو کابینہ اجلاس میں اس پیش رفت کی تصدیق کرتے ہوئے کہا کہ یہ اسرائیل کی ایک تاریخی روایت کا تسلسل ہے، جنگ میں ہلاک ہونے والے اپنے سپاہیوں کو وطن واپس لانا۔ نیتن یاہو نے کہا کہ “ریاست کے قیام سے ہی یہ ہمارا اصول رہا ہے کہ ہم اپنے شہیدوں کو واپس لاتے ہیں۔ آج ہم وہی کر رہے ہیں۔ ہمیں لیفٹیننٹ حیدر گولڈن کی لاش موصول ہو گئی ہے اور شناخت کی باضابطہ تصدیق کا عمل شروع کیا جا رہا ہے۔”

اسرائیلی وزیرِاعظم کے مطابق، لیفٹیننٹ حیدر گولڈن 2014 میں “آپریشن پروٹیکٹیو ایج” کے دوران غزہ میں ہلاک ہوئے تھے۔ ان کی لاش حماس کے قبضے میں تھی جس نے برسوں تک اسے واپس کرنے سے انکار کیا۔ اس دوران اسرائیل کی مختلف حکومتوں نے ہر ممکن کوشش کی کہ گولڈن کا جسدِ خاکی واپس لایا جا سکے۔ نیتن یاہو نے مزید کہا کہ “ہم نے جنگ کے آغاز میں وعدہ کیا تھا کہ تمام مغویوں کو واپس لائیں گے۔ 255 افراد کو یرغمال بنایا گیا تھا، جن میں سے 250 کو ہم واپس لا چکے ہیں اور باقی سب کو بھی واپس لائیں گے۔”

انہوں نے کہا کہ اسرائیل کی تاریخ گواہ ہے کہ ریاست اپنے سپاہیوں کو کبھی نہیں بھولتی۔ “آزادی کی جنگ سے لے کر حالیہ تنازعات تک، ہمارا اصول یہی رہا ہے ، اپنے شہیدوں کو وطن واپس لانا۔ کبھی کبھی یہ عمل طویل ہوتا ہے، جیسے کہ سلطان یعقوب کی لڑائی کے بعد، جسے 40 سال گزر چکے ہیں۔ ہم وہاں سے دو ہلاک فوجیوں کی لاشیں واپس لا چکے ہیں، ایک اور سپاہی کی باقیات کی تلاش جاری ہے۔”

نیتن یاہو نے کہا کہ یہ اسرائیلی فوجیوں اور سکیورٹی اہلکاروں کے تئیں ریاست کا مقدس فرض ہے۔ انہوں نے بتایا کہ اسرائیل اپنے سابق ایجنٹ ایلی کوہن کے باقیات کو واپس لانے کے لیے بھی مسلسل کوشش کر رہا ہے۔ وزیراعظم نے آخر میں کہا کہ “یہ صرف ایک فوجی یا ایک جنگ کی بات نہیں، بلکہ یہ اسرائیل کے شہریوں اور فوج کے درمیان اعتماد اور باہمی ذمہ داری کی علامت ہے۔ ہم اپنے ہر ہیرو کو واپس لائیں گے، خواہ اس میں برسوں لگ جائیں، یہی ہمارا عہد ہے، یہی ہمارا ایمان۔”

بھارت ایکسپریس اردو