International Yoga Day: یوگ کے عالمی دن کے موقع پر دنیا بھر میں جوش و خروش سے منائی گئیں تقریبات، دبئی، براتسلاوا اور ٹوکیو سمیت دنیا کے تقریباً 2,500 مقامات پر یوگا سیشنز

دبئی/براتسلاوا/ٹوکیو: 12ویں بین الاقوامی یوم یوگا 2026 کے موقع پر دنیا بھر میں جوش و خروش، توانائی اور عوامی شرکت کے ساتھ یوگا ڈے منایا گیا۔ اس سال کا موضوع ’’صحت مند بڑھاپے کے لیے یوگا‘‘ رکھا گیا، جس کا مقصد ہر عمر کے افراد کو صحت مند، متوازن اور فعال طرزِ زندگی اپنانے کی ترغیب دینا تھا۔ دنیا کے مشرقی کنارے سے مغربی کنارے تک لاکھوں افراد نے یوگا کی اجتماعی مشق میں حصہ لیا۔

دبئی میں خصوصی یوگا سیشن

متحدہ عرب امارات کے شہر دبئی میں بھارتی قونصل خانے نے دبئی پولیس کے تعاون سے دبئی پولیس آفیسرز کلب میں خصوصی یوگا سیشن کا اہتمام کیا۔ تقریب میں میجر جنرل محمد عیسیٰ العذب مہمانِ خصوصی کے طور پر شریک ہوئے۔ اس موقع پر دبئی پولیس کے اہلکاروں، یوگا کے شائقین، طلبہ اور مقامی برادری کے ارکان نے بڑی تعداد میں شرکت کی، جبکہ دبئی پولیس بینڈ کی خصوصی موسیقی نے تقریب کو مزید یادگار بنا دیا۔

براتسلاوا میں عوام کی بھرپور شرکت

سلوواکیہ کے دارالحکومت براتسلاوا کے تاریخی ہلاونے نامیستیے چوک میں بھی یوگا ڈے کی تقریب منعقد ہوئی، جہاں مقامی باشندوں نے پرجوش انداز میں شرکت کی۔ اس موقع پر سلوواکیہ میں ہندوستان کی سفیر اپوروا سریواستو نے اپنے خطاب میں کہا کہ یوگا کو روزمرہ زندگی کا حصہ بنایا جائے اور اس کی افادیت سے اہلِ خانہ اور دوستوں کو بھی روشناس کرایا جائے۔

بارش کے باوجود جاپان میں ریکارڈ شرکت

جاپان میں تسوکیجی ہونگان جی مندر میں منعقدہ یوگا پروگرام میں دو ہزار ایک سو سے زائد افراد نے حصہ لیا۔ بارش کے باوجود شرکا نے ’’یوگا ساتھ ساتھ، بارش ہو یا دھوپ‘‘ کے جذبے کے ساتھ یوگا کی مشق جاری رکھی۔ تقریب کے دوران مثبت توانائی، مسکراہٹوں اور بھرپور جوش و خروش کا ماحول دیکھنے میں آیا۔

دنیا بھر میں 2,500 مقامات پر تقریبات

بین الاقوامی یومِ یوگا کے موقع پر دنیا بھر میں تقریباً 2,500 مقامات پر ہندوستان کے 210 سے زائد سفارتی مشنز کی جانب سے یوگا پروگراموں کا انعقاد کیا گیا۔ اس عالمی جشن کی مرکزی تقریب کولکاتا کے تاریخی ریڈ روڈ پر منعقد ہوئی، جس میں وزیراعظم نریندر مودی نے شرکت کی۔

وزیراعظم مودی کا پیغام

اس موقع پر وزیراعظم نریندر مودی نے کہا کہ آج کا دن تاریخی ہے کیونکہ پوری دنیا یوگا کے ذریعے ایک مشترکہ رشتے میں بندھی ہوئی نظر آ رہی ہے۔ انہوں نے کہا کہ ’’یوگا نے سرحدوں، زبانوں اور ثقافتوں سے بالاتر ہو کر پوری انسانیت کو جوڑنے کا کام کیا ہے۔ ہمالیہ سے لے کر بحرِ ہند تک یوگا کی مثبت توانائی محسوس کی جا رہی ہے۔‘‘ انہوں نے کہا کہ یوگا صرف ورزش نہیں بلکہ ایک ایسا طرزِ زندگی ہے جو انسان کو جسمانی، ذہنی اور روحانی طور پر مضبوط بناتا ہے۔

بھارت ایکسپریس اردو۔