Twitter:ایلون مسک نے کانیے ویسٹ کا ٹویٹر اکاؤنٹ کیا معطل

Twitter:ٹوئٹر نے مشہور امریکی ریپر کانیے ویسٹ کا ٹوئٹر اکاؤنٹ تشدد اکسانے کے الزام میں معطل کر دیا ہے۔کانیے ان دنوں یہود مخالف بیانات کی وجہ سے تنازعات میں گھرے ہوئے ہیں۔ ریپر کانیے نے ایک حالیہ انٹرویو میں ہٹلر کی تعریف کی تھی۔ انہوں نے کہا تھا کہ وہ تانا شاہوں  کو پسند کرتا ہے ۔ اس کے علاوہ انہوں نے اپنے ٹوئٹر پر ایسی تصویر پوسٹ کی تھی جسے ٹوئٹر نے قواعد کی خلاف ورزی قرار دیا ہے۔

امریکی ریپر کانیے نے حال ہی میں ٹویٹر پر واپسی کی۔ مائیکروبلاگنگ سائٹ ٹوئٹر نے ان کا اکاؤنٹ معطل کردیا تھا تاہم ایلون مسک کے حصول کے بعد ان کا اکاؤنٹ دوبارہ بحال کردیا گیا۔ تقریباً دو ہفتوں کے بعد ٹوئٹر نے ایک بار پھر کا ئینے کا اکاؤنٹ معطل کر دیا ہے۔

امریکی ریپر کانیے ویسٹ نے اپنے ہینڈل پر ایک پوسٹ کی تھی۔ جس میں سواستیک کی تصویر نظر آرہی تھی۔ ٹوئٹر نے اس پوسٹ کو اپنے قوانین کی خلاف ورزی قرار دیتے ہوئے اکاؤنٹ بلاک کر دیا ہے۔

اس کے ساتھ ہی دنیا کے امیر ترین شخص اور ٹوئٹر کے مالک ایلون مسک نے ٹوئٹر پر اپنے ردعمل میں لکھا کہ معطلی تشدد کو بھڑکانے  کی وجہ سے کی    گئی ہے۔ مسک نے مزید لکھا کہ میری پوری کوشش کے باوجود ا نہوں نے تشدد بھڑکانے کے خلاف ہمارے اصول کی دوبارہ خلاف ورزی کی۔ ٹوئٹر کے علاوہ امریکی ریپر کانیے ویسٹ پر بھی انسٹاگرام جیسے کئی سوشل میڈیا پر پابندی عائد ہے۔

ریپر کانیے نے نہ صرف یہود دشمنی بلکہ بلیک لائیوز میٹر موومنٹ کا بھی مذاق اڑایا ہے۔ وہ پیرس فیشن ویک میں ایک ٹی شرٹ پہن کر پہنچے جس پر وائٹ لائیوز میٹر لکھا ہوا تھا۔ اس کے بعد ریپر نے اپنے ایک بیان میں کہا کہ جارج فلائیڈ کی موت پولیس کے ہاتھوں نہیں بلکہ منشیات کے استعمال کی وجہ سے ہوئی۔ اس بیان پر جارج کی بیٹی نے ویسٹ کے خلاف مقدمہ بھی درج کرایا تھا۔