Operation Pink Diamond by Dubai Police: دبئی پولیس نے 25 ملین ڈالر کے نایاب پنک ڈائمنڈ کی چوری کو بنایا ناکام، ہیرا برآمد، تین ملزمان گرفتار

دبئی: دبئی پولیس نے ایک نہایت قیمتی اور نایاب 25 ملین ڈالر مالیت کے پنک ڈائمنڈ کی چوری کی کوشش کو صرف آٹھ گھنٹوں میں ناکام بنا دیا۔ پولیس نے تین مشتبہ افراد کو گرفتار کر کے قیمتی پتھر برآمد کر لیا۔ یہ ملزمان ایک سال سے زائد عرصے سے اس منصوبے پر کام کر رہے تھے۔

’پنک ڈائمنڈ‘ آپریشن

پولیس نے اس کارروائی کو ’’پنک ڈائمنڈ آپریشن‘‘ کا نام دیا۔ 21.25 قیراط وزنی یہ ہیرا دنیا کے نایاب ترین جواہرات میں شمار ہوتا ہے اور ماہرین کے مطابق ایسی خالص معدنی خصوصیات والا ہیرا دوبارہ ملنے کے امکانات محض 0.01 فیصد ہیں۔

فرضی خریداروں کا جال

ایشیائی نژاد ملزمان نے دبئی کے ایک جیولر کو نشانہ بنایا۔ انہوں نے خود کو امیر خریدار ظاہر کرتے ہوئے قیمتی کاریں کرائے پر لیں، فائیو اسٹار ہوٹلز میں ملاقاتیں طے کیں اور یہاں تک کہ ایک ڈائمنڈ ایکسپرٹ بھی ساتھ رکھا تاکہ جیولر کا اعتماد حاصل کر سکیں۔ بعدازاں وہ جیولر کو ایک ولا میں لے گئے اور وہاں سے ہیرا چرا کر فرار ہو گئے۔

جدید ٹیکنالوجی اور بروقت چھاپے

چوری کے بعد ملزمان نے مختلف سمتوں میں فرار ہونے کی کوشش کی، تاہم دبئی پولیس کے کرمنل انویسٹی گیشن ڈیپارٹمنٹ (CID) نے جدید ٹریکنگ ٹیکنالوجی کا استعمال کرتے ہوئے ان کا سراغ لگایا۔ خصوصی ٹیموں نے بیک وقت مختلف مقامات پر چھاپے مار کر تینوں افراد کو گرفتار کیا اور وہ قیمتی ہیرا بھی برآمد کر لیا جو ایک ریفریجریٹر میں چھپا کر بیرون ملک بھیجا جا رہا تھا۔

جیولر کی جانب سے پولیس کو خراج تحسین

ہیرا درآمد کرنے والے جیولر نے دبئی پولیس کی فوری کارروائی کو سراہتے ہوئے کہا: ’’میرے فون کرنے کے چند منٹوں بعد ہی پولیس پہنچی، مجھے تسلی دی اور تحقیقات شروع کر دیں۔ اگلی ہی صبح ملزمان گرفتار ہو چکے تھے اور میرا ہیرا برآمد کر لیا گیا۔‘‘ جیولر نے دیگر تاجروں کو مشورہ دیا کہ وہ دبئی کے محفوظ اور عالمی معیار کے تجارتی ضوابط پر سختی سے عمل کریں تاکہ شہر کی شہرت برقرار رہے۔

 بھارت ایکسپریس اردو۔