Five killed in shooting: جرمنی میں نوجوانوں کی فلاحی رہائش گاہ میں خونریز واقعہ، کم از کم پانچ افراد ہلاک، دو مشتبہ افراد گرفتار

اسٹاڈے (جرمنی): جرمنی کے شمالی شہر اسٹاڈے میں نوجوانوں کی فلاحی رہائش گاہ میں پیر کے روز فائرنگ کے واقعے میں کم از کم پانچ افراد ہلاک جبکہ کئی دیگر زخمی ہو گئے۔ پولیس کے مطابق اطلاع ملنے پر فوراً موقع پر پہنچنے والی ٹیموں نے کارروائی کرتے ہوئے دو مشتبہ افراد کو گرفتار کر لیا، جن میں مبینہ حملہ آور بھی شامل ہے۔

تحقیقات جاری، علاقہ اب محفوظ

پولیس حکام نے بتایا کہ فائرنگ کے واقعے کی وجوہات اور دیگر حالات کی تحقیقات جاری ہیں۔ حکام کے مطابق متاثرہ علاقے کو مکمل طور پر محفوظ بنا دیا گیا ہے اور عوام کے لیے فی الحال کسی مزید خطرے کی اطلاع نہیں ہے، تاہم شہریوں سے کہا گیا ہے کہ تحقیقات مکمل ہونے تک علاقے کے قریب جانے سے گریز کریں۔ اس واقعے کے بعد لونیبرگ پولیس نے اپنے سرکاری سوشل میڈیا اکاؤنٹ پر الرٹ جاری کرتے ہوئے کہا کہ اسٹاڈے کی ڈانکرز شٹراسے میں پولیس آپریشن جاری ہے، اس لیے شہری علاقے سے دور رہیں۔

حملے کا مقصد تاحال معلوم نہیں

پولیس نے تاحال ہلاک اور زخمی ہونے والوں کی شناخت یا حملے کے ممکنہ محرکات کے بارے میں کوئی معلومات جاری نہیں کی ہیں۔ حکام کا کہنا ہے کہ جیسے جیسے تحقیقات آگے بڑھیں گی، واقعے سے متعلق مزید تفصیلات عوام کے سامنے لائی جائیں گی۔

بھارت ایکسپریس اردو۔