Sanjay Dutt Story: کھانے کے بیچ سے بھاگے تھے سنجو بابا، جانئےسنیل دت کی سختی کا دلچسپ قصہ

ممبئی: اداکار سنجے دت اپنی زبردست اداکاری کے لیے جانے جاتے ہیں اور جلد ہی فلم ’آخری سوال‘ میں نظر آئیں گے۔ سلیبریٹی ٹاک شو ’جینا اسی کا نام ہے‘ میں گفتگو کے دوران سنجے دت نے اپنے والد اور معروف اداکار سنیل دت کی سختی سے جڑا ایک دلچسپ واقعہ سنایا۔ انہوں نے بتایا کہ ان کے والد سیٹ پر بہت سخت مزاج کے تھے اور ان کی بات پر کوئی سوال نہیں اٹھا سکتا تھا۔

کھانے کا واقعہ کیسے پیش آیا؟

سنجے دت نے کشمیر میں فلم کی شوٹنگ کے دوران پیش آنے والا واقعہ یاد کرتے ہوئے بتایا کہ ایک دن ان کے والد نے ایک سین تیار کر رکھا تھا، اسی دوران ایک اسسٹنٹ ان کے پاس آیا اور انہیں کھانا کھانے کے لیے کہہ دیا۔ حالانکہ باضابطہ بریک نہیں ہوا تھا، مگر وہ اسسٹنٹ کی بات مان کر ریسٹورنٹ چلے گئے۔ انہوں نے بتایا کہ وہ ابھی کھانا کھا ہی رہے تھے کہ کچھ لوگ دوڑتے ہوئے آئے اور بتایا کہ دت صاحب بہت غصے میں ہیں۔ یہ سن کر وہ فوراً سیٹ پر واپس پہنچے۔

والد کی ڈانٹ

سنجے دت کے مطابق، واپس پہنچنے پر سنیل دت نے انہیں سختی سے ڈانٹا اور کہا، ’’تمہاری ہمت کیسے ہوئی؟ پوری یونٹ یہاں موجود ہے اور تم کھانا کھانے چلے گئے؟ کیا تم ابھی سے اسٹار بن گئے ہو؟‘‘ بعد میں جب سنیل دت نے اسسٹنٹ سے پوچھا تو اس نے انکار کر دیا کہ اس نے سنجے کو کھانے کے لیے بھیجا تھا، جس پر صورتحال مزید دلچسپ ہو گئی۔

نئی فلم کی تیاری

اداکار جلد ہی فلم ’’آخری سوال‘‘ میں نظر آئیں گے۔ اس فلم کو نیشنل ایوارڈ یافتہ ابھیجیت موہن ورنگ نے ڈائریکٹ کیا ہے۔ اس فلم میں سنجے دت، امیت سدھ اور سمیرا ریڈی نے کام کیا ہے، جو طویل عرصے کے بعد اسکرین پر قدم رکھ رہی ہیں۔ اس فلم میں نماشی چکرورتی، نیتو چندرا اور تریدھا چودھری نے بھی اہم کردار ادا کیے ہیں۔ فلم 8 مئی کو سینما گھروں میں ریلیز کی جائے گی۔

بھارت ایکسپریس۔