Actress Deepika Padukone: دیپیکا پڈوکون سے متاثر سنجے دت کی بیٹی، تریشالا نے بتایا بالی ووڈ میں آنے کی اصل وجہ

نئی دہلی :بالی ووڈ اداکار سنجے دت کی بیٹی تریشالا دت نے حال ہی میں ایک انٹرویو میں اپنی ذاتی زندگی اور کیریئر سے متعلق دلچسپ انکشافات کیے ہیں۔ تریشالا، جو امریکہ میں رہتی ہیں اور اب تک بالی ووڈ سے دور رہی ہیں، نے پہلی بار کھل کر بتایا کہ وہ فلمی دنیا میں قدم رکھنے کے بارے میں کیوں سوچتی رہی ہیں۔تریشالا دت نے ایک پوڈکاسٹ کے دوران کہا کہ بچپن میں ان کا خیال تھا کہ وہ بالی ووڈ کا حصہ بنیں گی، لیکن اس کی وجہ اداکاری کا شوق نہیں تھا۔ ان کے مطابق، وہ صرف اپنے والد سنجے دت کے قریب رہنا چاہتی تھیں اور ان کے ساتھ زیادہ وقت گزارنے کی خواہش رکھتی تھیں۔ یہی جذبات انہیں فلمی دنیا کی طرف لے جا رہے تھے۔

انہوں نے بتایا کہ سجنے دت نے بھی انہیں حقیقت سے آگاہ کیا تھا۔ سنجے دت نے واضح طور پر کہا تھا کہ فلمی خاندان سے تعلق رکھنے کا یہ مطلب نہیں کہ کامیابی خود بخود مل جائے گی یا بڑے فلمی مواقع آسانی سے حاصل ہو جائیں گے۔ اس نصیحت نے تریشالا کو حقیقت پسندانہ سوچ اپنانے میں مدد دی۔گفتگو کے دوران تریشالا نے ذہنی صحت کے موضوع پر بھی کھل کر بات کی۔ انہوں نے کہا کہ جب دیپیکا پڈوکون نے اپنے ڈپریشن اور ذہنی صحت کے مسائل پر عوامی سطح پر بات کی تو انہیں بے حد فخر محسوس ہوا۔ تریشالا کے مطابق، اسی سے متاثر ہو کر انہوں نے تھراپسٹ بننے کا فیصلہ کیا تاکہ وہ لوگوں کو یہ احساس دلا سکیں کہ وہ اپنی مشکلات میں اکیلے نہیں ہیں۔انہوں نے یہ بھی کہا کہ اگرچہ وہ ایک فلمی خاندان سے تعلق رکھتی ہیں، لیکن انہوں نے اپنے اردگرد کسی کو ذہنی صحت جیسے اہم موضوع پر کھل کر بات کرتے نہیں دیکھا۔ یہی وجہ ہے کہ انہوں نے اس میدان کو اپنا مقصد بنایا اور لوگوں سے جڑنے کی کوشش کی۔

تریشالا دت کی ذاتی زندگی بھی چیلنجز سے بھری رہی ہے۔ ان کی والدہ رچا شرما کا انتقال کم عمری میں برین ٹیومر کے باعث ہو گیا تھا، جس کے بعد انہوں نے اپنی زندگی کا بڑا حصہ امریکہ میں گزارا۔ اس کے باوجود وہ اپنے خاندان، خاص طور پر اپنی سوتیلی ماں مانیتا دت اور سوتیلے بہن بھائیوں کے ساتھ مضبوط رشتہ رکھتی ہیں۔تریشالا کی یہ کہانی اس بات کی عکاسی کرتی ہے کہ بالی ووڈ میں آنے کا خواب صرف شہرت کے لیے نہیں، بلکہ بعض اوقات خاندانی قربت اور ذاتی جذبات بھی اس کے پیچھے کارفرما ہوتے ہیں۔

بھارت ایکسپریس اردو