نئی دہلی :ممبئی میں بالی وڈ کے معروف پروڈیوسر اور ڈائریکٹر روہت شٹی کے گھر فائرنگ کے واقعے نے شہر میں سنسنی مچا دی۔ یکم فروری کی صبح پیش آنے والے اس واقعے کی نئی سی سی ٹی وی فوٹیج سامنے آئی ہے، جس میں ملزم شوٹر واقعے کے فوراً بعد تیزی سے وہاں سے فرار ہوتا دکھائی دے رہا ہے۔ پولیس اس فوٹیج کو تحقیقات کے لیے اہم قرار دے رہی ہے اور اسے ملزمان تک پہنچنے کا ایک قیمتی ذریعہ مانتی ہے۔ اس واقعے کے بعدولے پارلے مغرب کے ایک ہوٹل کے قریب ایک لاوارث اسکوٹر برآمد کیا گیا، جو شٹی ٹاور سے تقریباً دو کلومیٹر دور پایا گیا۔ ابتدائی شبہ کے مطابق ملزم اسی اسکوٹر پر سوار ہو کر موقع پر آیا اور واردات کے بعد اسے چھوڑ کر فرار ہو گیا۔ تحقیقات میں یہ بھی سامنے آیا کہ اس اسکوٹر سے ثبوت مٹانے کی کوشش کی گئی، جس کے باعث فوراً فورینسک ٹیم کو موقع پر بلایا گیا۔ ٹیم نے اسکوٹر سے فنگر پرنٹس، ڈی این اے سیمپلز اور دیگر اہم شواہد جمع کیے تاکہ واقعے کے ملزمان تک پہنچا جا سکے۔
مزید تحقیقات میں یہ بات بھی سامنے آئی کہ یہ سیکنڈ ہینڈ ہونڈا ڈی او اسکوٹر پونے کے کَرْوے نگر کے رہائشی امن ماروٹے سے خریدا گیا تھا۔ پولیس کے مطابق پانچ گرفتار شدہ ملزمان میں سے ایک 19 سالہ آدتیہ گائکی نے یہ اسکوٹر خریدا۔ اطلاعات کے مطابق یہ خریداری جنوری کے وسط میں تقریباً تیس ہزار روپے میں کی گئی، اور یہ کارروائی معاون سمرت پوماجی کی ہدایت اور شبھم لونکر کے کہنے پر انجام دی گئی، جس کے لیے سُپنیل ساکٹ نے رقم فراہم کی۔
پولیس نے تمام ملزمان سے تقتیش شروع کر دی ہے اور سی سی ٹی وی فوٹیج کے ساتھ ساتھ فورینسک رپورٹ کی بنیاد پر تحقیقات جاری ہیں۔ جمع کیے گئے شواہد ملزمان کی شناخت اور واقعے میں ان کی ملوثیت ثابت کرنے میں مددگار ثابت ہوں گے۔ پولیس واقعے کے محرکات اور اسکی منصوبہ بندی کا بھی جائزہ لے رہی ہے، تاکہ ایسے واقعات کی روک تھام کے لیے اقدامات کیے جا سکیں۔واقعے نے بالی وڈ اور ممبئی کی سکیورٹی انتظامات پر بھی سوالات اٹھا دیے ہیں، اور شہریوں میں بھی تشویش پائی جاتی ہے کہ کس طرح ایک مشہور ہستی کے گھر کے قریب اس قسم کی واردات ممکن ہوئی۔ فی الحال پولیس کی ٹیمیں حالات کا جائزہ لے رہی ہیں اور تمام دستیاب شواہد کی مدد سے مکمل تحقیقات میں مصروف ہیں تاکہ واقعے کے اصل ذمہ داروں کو سامنے لایا جا سکے۔
بھارت ایکسپریس اردو