Salman Khan House Firing Case: سلمان خان کے گھر پر فائرنگ کا معاملہ، ممبئی کرائم برانچ نے ‘مکوکا’ کورٹ میں چارج شیٹ داخل کی، جانئے تفصیلات

بالی ووڈ اداکار سلمان خان کے گھر پر فائرنگ کیس سے متعلق اہم معلومات منظر عام  پر آ رہی ہیں۔ ممبئی کرائم برانچ نے ملزم کے خلاف ‘مکوکا’ عدالت میں چارج شیٹ داخل کی ہے۔ اس معاملے میں ‘مکوکا’ اپریل میں لگایا گیا تھا۔ جبکہ اب اس کے تحت چارج شیٹ داخل کی گئی ہے۔ ممبئی کرائم برانچ نے اب تک گرفتار ملزمان کے ساتھ ساتھ لارنس بشنوئی اور انمول بشنوئی کے خلاف چارج شیٹ داخل کی ہے۔

MCOCA کیا ہے؟

سب سے پہلے ہم آپ کو بتاتے ہیں کہ مکوکا کیا ہے؟ مکوکا کا فل فارم  ‘مہاراشٹرا کنٹرول آف آرگنائزڈ کرائم ایکٹ’ ہے۔ اس قانون کی خاصیت یہ ہے کہ ملزم کو کیس کی تفتیش مکمل ہونے تک جیل کی سلاخوں کے پیچھے رہنا پڑتا ہے۔ اس سے پہلے ملزم کی ضمانت نہیں ہوتی۔ سال 1999 میں مہاراشٹر حکومت نے انڈر ورلڈ کے بڑھتے ہوئے جرائم کے پیش نظر یہ قانون لایا تھا۔ مہاراشٹر کے علاوہ دہلی میں بھی اس قانون پر عمل کیا جاتا ہے۔

14 اپریل 2024 کی صبح تقریباً 5 بجے بالی ووڈ اداکار سلمان خان کے گھر گلیکسی اپارٹمنٹ میں موٹر سائیکل پر سوار دو شوٹروں نے فائرنگ کی۔ بتایا جاتا ہے کہ اداکار کے گھر پر 5 راؤنڈ فائرنگ کی گئی۔ اس کے بعد گرفتاری کے ڈر سے ملزمان موٹر سائیکل چھوڑ کر فرار ہو گئے۔

دونوں شوٹروں کو گجرات سے گرفتار کیا گیا۔

گینگسٹر لارنس بشنوئی نے سلمان خان کے گھر پر فائرنگ کی ذمہ داری قبول کی تھی۔ پولیس نے فائرنگ کرنے والے دونوں شوٹروں کو گجرات سے گرفتار کیا تھا۔ دونوں شوٹروں کی شناخت وکی گپتا (24) اور ساگر پال (21) کے طور پر کی گئی ہے۔ اس معاملے میں پولیس نے انوج تھاپر کو بھی شوٹروں کو ہتھیار فراہم کرنے کے الزام میں گرفتار کیا تھا۔ جس نے جیل میں خودکشی کر لی تھی۔ بتایا جاتا ہے کہ انوج لارنس بشنوئی سے بھی رابطے میں تھا۔

فائرنگ کے وقت سلمان خان کیا کر رہے تھے؟

ممبئی پولیس نے اس معاملے میں سلمان اور ان کے اہل خانہ کے بیانات بھی ریکارڈ کیے تھے۔ پولیس نے سلمان کے علاوہ ان کے دو بھائیوں ارباز خان اور سہیل خان کے بیانات قلمبند کر لیے۔ سلمان نے اپنے بیان میں بتایا تھا کہ جب ان کے گھر پر فائرنگ ہوئی تو وہ کیا کر رہے تھے۔

سلمان خان کا بیان ممبئی کرائم برانچ نے ان کے گھر پر ریکارڈ کیا۔ 4 جون کو ریکارڈ کرائے گئے بیان میں سلمان نے بتایا تھا کہ جب ان کے گھر پر فائرنگ ہوئی تو وہ سو رہے تھے۔ اس رات اداکار کے گھر پر پارٹی بھی تھی۔ جس کی وجہ سے وہ رات کو دیر سے سوئے تھے ۔ تاہم گولیوں کی آواز سن کر سلمان جاگ گئے۔ فائر کیے گئے پانچ راؤنڈز میں سے ایک گولی اداکار کے گھر کی دیوار پر لگی۔ جبکہ ایک گولی جال میں گھس کر ڈرائنگ روم میں داخل ہو گئی تھی۔

بھارت ایکسپریس۔