Ravi Kishan reacts to his slip of tongue: ’‘سمجھ نہیں آتا میں کیوں وائرل ہو جاتا ہوں…‘‘، زبان پھسلنے اور میمز پر روی کشن نے دیا ردعمل

ممبئی: سوشل میڈیا کے دور میں چاہے کتنی ہی احتیاط کیوں نہ برتی جائے، ایک چھوٹی سی غلطی بھی پل بھر میں وائرل ہو جاتی ہے۔ اکثر اس کا خمیازہ بڑی شخصیات کو بھگتنا پڑتا ہے۔ ایسا ہی کچھ اداکار اور رکنِ پارلیمنٹ روی کشن کے ساتھ ہوا۔ حال ہی میں میڈیا سے گفتگو کے دوران زبان پھسلنے کے بعد سوشل میڈیا پر ان کے کئی میمز بنائے گئے، جس پر انہوں نے فلم ’ماں بہن‘ کے ٹریلر لانچ ایونٹ میں ردعمل ظاہر کیا۔ روی کشن نے وضاحت کی کہ انہیں اس بات کا کچھ بھی اندازہ نہیں تھا کہ انٹرنیٹ پر آخر کون سی چیز انہیں وائرل بنا دیتی ہے۔

 ’نہیں معلوم کیوں وائرل ہو جاتا ہوں’

ٹریلر لانچ تقریب کے دوران جب اداکار سے ان کی زبان پھسلنے کے بارے میں سوال کیا گیا تو انہوں نے میڈیا سے کہا، “میں دل سے اور مہادیو کی قسم کھا کر کہتا ہوں کہ مجھے خود سمجھ نہیں آتا کہ میں کیوں وائرل ہو جاتا ہوں۔ ابھی حال ہی میں میں نے ’ورک فرام ہوم‘ کی جگہ غلطی سے ‘ہوم فرام ورک’ کہہ دیا تھا۔ اس سے کچھ وقت پہلے جب میں پارلیمنٹ جا رہا تھا تو میں نے ’دی لیٹ‘ کی جگہ ’جلدی دی لیٹ‘ کہہ دیا تھا۔” روی کشن نے مزید کہا، “آخر میں بھی ایک انسان ہی ہوں۔ ایسی غلطیاں ہوتی رہتی ہیں اور شاید آئندہ بھی ہوتی رہیں گی۔ لوگ مجھے اس طرح کیوں دیکھتے ہیں جیسے میں کوئی انسان نہیں ہوں یا کسی دوسری دنیا سے آیا ہوں؟”

‘ہوم فرام ورک’ بیان پر بنے تھے میمز

واضح رہے کہ چند روز قبل اداکار اُس وقت وائرل ہو گئے تھے جب ایندھن بچانے کے طریقوں اور پبلک ٹرانسپورٹ کے استعمال سے متعلق بیداری پر میڈیا سے گفتگو کرتے ہوئے انہوں نے غلطی سے ’ورک فرام ہوم‘ کے بجائے ’ہوم فرام ورک‘ کہہ دیا تھا۔ اس کے بعد سوشل میڈیا پر میمز کی بھرمار ہوگئی اور کئی صارفین نے ان کے اس بیان کا موازنہ ان کے پہلے وائرل جملے ’جلدی دی لیٹ‘ سے کیا تھا۔

‘یہ فلم ضرور وائرل ہوگی’

اداکار نے مزید کہا کہ لوگ ان سے مسلسل پوچھتے رہتے ہیں کہ وہ آخر اتنے وائرل کیسے ہو جاتے ہیں۔ اس پر انہوں نے مسکراتے ہوئے کہا، ’’میں ایک بار پھر سب کو بتانا چاہتا ہوں کہ مجھے واقعی اس بات کا کوئی اندازہ نہیں، لیکن یہ فلم ضرور وائرل ہوگی۔”

بھارت ایکسپریس۔