Khatron Ke Khiladi 15: ‘خطروں کے کھلاڑی 15’ میں گورو کھنہ اور ہرش گجرال کی انٹری، روہت شیٹی کے ساتھ خطرناک اسٹنٹس کے لئےتیار

نئی دہلی : مشہور فلم ہدایتکار روہت شیٹی ایک بار پھر اپنے مقبول ریئلٹی شو خطروں کے کھلاڑی کے نئے سیزن کے ساتھ واپسی کے لیے تیار ہیں۔ کلرز چینل پر نشر ہونے والا یہ اسٹنٹ بیسڈ شو اس بار اپنے 15ویں سیزن میں پہلے سے زیادہ ایکشن، ڈرامہ اور سنسنی خیز لمحات کے ساتھ ناظرین کو محظوظ کرے گا۔اس سیزن کی خاص بات یہ ہے کہ اس میں نئے اور دلچسپ چہرے شامل کیے گئے ہیں، جن میں اسٹینڈ اپ کامیڈین ہرش گجرال اور Bigg Boss 19 کے فاتح گوروکھنہ نمایاں ہیں۔ دونوں شخصیات پہلی بار اس خطرناک شو میں اپنی ہمت اور حوصلے کا امتحان دیتی نظر آئیں گی۔گورو کھنہ، جو حال ہی میں بگ باس 19 کا ٹائٹل جیت کر خبروں میں رہے، اب ایک بالکل مختلف چیلنج کا سامنا کرنے جا رہے ہیں۔ اپنی پُرسکون اور متوازن شخصیت کے لیے جانے جانے والے گورو اس شو میں اپنے کمفرٹ زون سے باہر نکل کر مشکل اور سنسنی خیز اسٹنٹس انجام دیتے دکھائی دیں گے۔ ان کا کہنا ہے کہ یہ شو انہیں فوری فیصلے لینے اور اپنی جبلت پر بھروسہ کرنے کی ترغیب دیتا ہے، جو ان کے لیے ایک نیا تجربہ ہوگا۔

دوسری جانب ہرش گجرال، جو اپنی حاضر جوابی اور بے باک مزاحیہ انداز کے لیے مشہور ہیں، پہلی بار کسی بڑے ٹی وی ریئلٹی شو میں حصہ لے رہے ہیں۔ انہوں نے کہا کہ اب تک وہ اسٹیج پر غیر متوقع لمحات کو ہنسی مذاق سے سنبھالتے آئے ہیں، لیکن یہاں انہیں حقیقی خوف اور خطرات کا سامنا ہوگا۔ ہرش کو امید ہے کہ وہ اس نئے میدان میں بھی اپنے مزاح کو برقرار رکھتے ہوئے ناظرین کو محظوظ کریں گے۔

شو کے حوالے سے دونوں فنکاروں نے اپنے جوش اور تیاری کا اظہار کیا ہے۔ گورو کھنہ کا کہنا ہے کہ وہ ہر چیلنج کو پوری ایمانداری سے قبول کریں گے، جبکہ ہرش گجرال اس تجربے کو ایک نئے “رن میدان” کے طور پر دیکھ رہے ہیں جہاں وہ اپنی صلاحیتوں کو آزمانا چاہتے ہیں۔خطروں کے کھلاڑی کا 15واں سیزن جلد ہی کلرز چینل پر نشر کیا جائے گا، جس میں روہت شیٹی کی میزبانی میں ایکشن اور تفریح کا بھرپور امتزاج دیکھنے کو ملے گا۔ گورو کھنہ اور ہرش گجرال کے علاوہ بھی کئی مضبوط اور دلچسپ کنٹیسٹنٹس اس سیزن کا حصہ بنیں گے، جو اس شو کو مزید سنسنی خیز بنائیں گے۔

بھارت ایکسپریس اردو